«ՀՀ կառավարության նպատակն է հանրապետությունում բարեփոխումների միջոցով ապահովել մեր երկրի գերագույն արժեքի՝ ՀՀ քաղաքացու պաշտպանվածությունը, արժանապատվությունը, կենսամակարդակի բարձրացումը, արդար հասարակության մեջ ապրելը, ապագայի նկատմամբ լավատեսությունը»,- այսպես ԱԺ-ում կառավարության ղեկավարը՝ Կարեն Կարապետյանը ներկայացրեց կառավարության նոր ծրագիրը:
Նա հայտարարեց. «Մենք պետք է ամեն ինչ անենք՝ կայուն եւ ակտիվ քաղաքացիական դիրքորոշում ունեցող միջին խավ շարունակաբար ձեւավորելու եւ փայփայելու համար: Միայն բոլորիս շահագրգիռ եւ միասնական ջանքերի շնորհիվ հնարավոր է լուծել մեր առջեւ կայացած խնդիրները: Կառավարությունը պետք է առաջնորդի այդ ջանքերը: Բարեփոխումները պետք է սկսենք հենց կառավարությունից: Մենք պետք է նոր շունչ հաղորդենք տեղական ինքնակառավարման մարմիններին՝ դրանք դարձնելով ժամանակակից, ճկուն եւ արդյունավետ: Այդ համակարգերը ասես սանիտարական մաքրման ենթարկելով՝ պետք է հասնենք նրան, որ նվազագույն ծախսերով ապահովենք առավելագույն արդյունավետություն»:
Կարեն Կարապետյանը խոսեց նաեւ պետական համակարգում կոռուպցիայի մասին՝ նշելով, որ դրա մասին շատ են խոսում. «Ես վստահ եմ, որ հասարակությունը կզգա համապատասխան ազդակները»:
Նա ասաց, որ կառավարության պետական մարմինները պետք է ունենան իրենց գործն անելու բավարար լիազորություններ, բայց եւ՝ համապատասխան պատասխանատվություն:
Կարդացեք նաև
Կարեն Կարապետյանը խոսեց նաեւ մեկ պատուհանի սկզբունքից, ասաց, որ պետական կառավարման մարմինները պետք է ոչ թե աշխատողների համար զբաղվածություն ապահովեն, այլ քաղաքացիներին ծառայություն մատուցեն, եթե այդ ծառայությունները արդյունավետ չեն, թանկարժեք են՝ պետք է վերանան, կամ փոխակերպվեն. «Կարեւոր է հիշել՝ պետական պաշտոնյաները իրենց պաշտոնները ժառանգած պետեր չեն, այլ՝ ընդամենը ծառայություն մատուցողներ են: Կարեւոր է, որ պետական մարմինների դուռը թակելով՝ քաղաքացիները նորմալ ծառայություն ստանան: Սա մշակույթ է, որի համար ժամանակ է պետք, բայց պետք է քայլեր կատարել այսօրվանից»:
Կարեն Կարապետյանն ասաց, որ բազմաթիվ ծրագրեր վերանայելու կարիք ունեն:
Հռիփսիմե ՋԵԲԵՋՅԱՆ
