ԱԺ-ում քիչ առաջ քվեարկության դրվեց, երկրորդ ընթերցմամբ եւ ամբողջությամբ ընդունվեց Ընտրական օրենսգրքում փոփոխությունների նախագիծը՝ 103 կողմ, 4 դեմ եւ 4 ձեռնպահ ձայների հարաբերակցությամբ:
Ինչպես տեղեկացրել ենք, վիճելի հարցերի շուրջ երեկ 5 խմբակցությունները համաձայնության եկան կառավարության հետ: Խաչատուր Քոքոբելյանը հայտարարեց, որ կոնսենսուսային տարբերակը որեւէ հարց չի լուծում ուրիշի փոխարեն քվեարկելու մասին հայտարարություն անողի համար. «Եթե որեւէ մեկը զրպարտեր եւ դիտավորյալ բողոքներ ներկայացներ, ՀՀ դատարաններում կարող էին այդ հարցը քննարկել: Սա նույն մեխանիզմն է եւ կարող են մեկնաբանել ինչպես ցանկանան: Սա բողոքարկման ինստիտուտը վերացնելու յուրովի ձեւ է»:
Քվեարկությունից հետո Լեւոն Զուրաբյանը շնորհավորեց. «Ընտրողների ցուցակները հրապարակելու համար հասարակությունը պայքարել է տարիներ շարունակ, եւ ես ցանկանում եմ շնորհավորել Հայաստանում ժողովրդավարության հաղթանակի բոլոր կողմնակիցներին՝ այս կարեւոր նվաճման համար»:
Քվեարկության դրվեցին եւ ընդունվեցին նաեւ «Գույքի նկատմամբ իրավունքների գրանցման մասին», «Ընդերքի մասին» եւ մի շարք այլ օրենքներում փոփոխությունների նախագծերը:
Կարդացեք նաև
Նաեւ քվեարկության դրվեց «Քրեական օրենսգրքում» փոփոխությունների նախագիծը երկրորդ ընթերցմամբ եւ ամբողջությամբ ընդունվեց՝ 109 կողմ, 2 ձեռնպահ ձայների հարաբերակցությամբ:
Հռիփսիմե ՋԵԲԵՋՅԱՆ
