Հավաստիացնում է ՀՀ-ում Գերմանիայի արտակարգ եւ լիազոր դեսպան Մաթիաս Քիսլերը՝ նկատի ունենալով մշակութային միջոցառումները
Դեռեւս 19-րդ դարի սկզբից գերմանացիները հետաքրքրվել են հայերով ու Հայաստանով: Օրինակ՝ «Հայկական լեռնաշխարհ» հասկացությունը գիտական շրջանառության մեջ է դրել երկրաբան Հերման Աբիխը: Գիտնականներ Հյուբշմանը, Մարկվարտը եւ ուրիշներ մեծ ծառայություններ են մատուցել հայագիտությանը, իսկ Յոզեֆ Ստրժիգովսկին «աշխարհի աչքերը բացեց» հայ ճարտարապետության առանձնահատկության վրա: Բազմաթիվ հայ ուսանողներ, որոնք հետագայում դարձան մեր մշակույթի եւ գիտության ականավոր գործիչներ, իրենց կրթությունը ստացել են գերմանական համալսարաններում մինչեւ Առաջին համաշխարհային պատերազմը: Գերմանիայի երաժշտանոցներում է կրթվել Կոմիտասը:
Վերջերս երեւանյան 10-րդ երաժշտական փառատոնի շրջանակներում կայացավ այս տարվա թերեւս ամենամեծ մշակութային իրադարձություններից մեկը՝ Գերմանիայի Յենա քաղաքի եւ Հայաստանի ազգային ֆիլհարմոնիկ նվագախմբերի համատեղ համերգը՝ նվիրված Գերմանիայի միասնության օրվան ու Հայաստանի անկախության 25-ամյակին: Այսօր Գերմանիայում են ապրում ու ստեղծագործում հայ նշանավոր երաժիշտներ, այդ թվում՝ ջութակահար Սերգեյ Խաչատրյանը, հենց գերմանական օպերային թատրոններից է սկսվել սոպրանո Հասմիկ Պապյանի հաղթարշավը: Գերմանիայի Բրանդեբուրգ տարածքի Պրյոտցել կոմունայում վերջին շրջանում ավանդաբար անցկացվում է Կոմիտասի անվան միջազգային մրցույթ-փառատոնը եւ այլն:
Այսօր Գերմանիան իրեն է ձգում աշխարհի լավագույն արվեստագետներին, մասնավորապես՝ երաժիշտներին. այս դիտարկմամբ «Առավոտը» սկսեց զրույցը Հայաստանում Գերմանիայի արտակարգ եւ լիազոր դեսպան Մաթիաս Քիսլերի հետ: Նաեւ հետաքրքրվեցինք՝ մի քանի տասնյակ նվագախմբեր եւ օպերային թատրոններ ունեցող երկիրը ունի,՞ արդյոք, դասական երաժշտության այդքա՜ն ունկնդիր: «Իմ երկրում դասական արվեստի, այդ թվում՝ երաժշտության հանդիսատեսի մեծ թիվը եղել է ու կա: Դա պայմանավորված է ֆեդերալ համակարգով, ինչն իրականացվում է համայնքային իշխանությունների կողմից, առանց միասնական կառավարման: Գրեթե բոլոր մեծ քաղաքներն ունեն իրենց նվագախմբերն ու օպերային թատրոնները»,- հայտնեց դեսպանը: Նշեց նաեւ, որ իր երկրում այսօր ապրող ու ստեղծագործող հայ երաժիշտների մեծ թիվը խոսուն վկան է հայաստանյան կրթության բարձր որակի: «Այսինքն՝ այս դեպքում մենք նույն հարթության վրա ենք»,- հավելեց պարոն Քիսլերը:
Կարդացեք նաև
Գերմանացի արվեստագետները ցանկալի հյուր են «Հայֆեստ» եւ «Ոսկե ծիրան» փառատոներին: Բեռլինի Մաքսիմ Գորկու անվան թատրոնը, որը ժամանակին Գերմանիայում ներկայացրել էր Ֆ. Վերֆելի «Մուսա լեռան 40 օրը», օրերս Երեւանում խաղաց Ավրորայի մասին ներկայացում: Այս առիթով դեսպանը նշեց, որ դերակատարն էլ ծագումով թուրք՝ գերմանացի արտիստ է. «Նման կերպ, կարծում եմ, կարելի է աջակցել հայ եւ թուրք հասարակությունների փոխըմբռնման հաստատմանը»:
Մաթիաս Քիսլերը զրույցի ընթացքում հիշեցրեց՝ Հայաստանում առաջին անգամ գերմանախոս հաստատությունների կողմից կազմակերպված մշակույթի տարբեր ճյուղեր ընդգրկող (ֆիլմերի ցուցադրություններ, ընթերցումներ եւ այլն) միջոցառումների մասին: Հարցին, թե ո՞ր կողմի նախաձեռնությամբ ու միջոցներով են հիմնականում կայանում հայաստանյան միջոցառումները, դեսպանը հայտնեց. «Ուրախ եմ փաստելու, որ նախաձեռնողը հիմնականում հայկական կողմն է: Հաճախ միջոցառումների կայացման գործում դերակատարում են ունենում գերմանական որոշ կազմակերպություններ եւս: Օրինակ՝ նոյեմբերին Երեւան կժամանի Դրեզդենի սիմֆոնիկ նվագախումբը՝ գերմանական կողմի աջակցությամբ: Տարբեր նախագծերի առիթով սիրով համագործակցում ենք մեր գլխավոր գործընկեր Հայաստանի մշակույթի նախարարության հետ: Ի դեպ, վերջինս է հանդիսանում Յենայի նվագախմբի հյուրընկալ կողմը: Ձեր երկրում մենք ունենք հիանալի գործընկեր՝ ի դեմս Հայաստանի ազգային ֆիլհարմոնիկ նվագախմբի, «Ոսկե ծիրան», «Երեւանյան հեռանկարներ» փառատոների»:
Հարցին՝ դեսպանատունը չի՞ մտածում միջոցառումներին մասնակից դարձնել նաեւ Հայաստանի մարզերը, մեր զրուցակիցը պատասխանեց. «Անկասկած կարեւորում ենք մարզային միջոցառումները: Օրինակ, Յենայի ֆիլհարմոնիկի երաժիշտները վարպետության դասեր անցկացրին Գյումրիում: Վանաձորում, Սիսիանում ժամանակին կազմակերպել ենք ցուցահանդեսներ, Գյումրիում էլ տարբեր միջոցառումներ, այդ թվում՝ համր ֆիլմերի ցուցադրություն: Առաջիկայում աշխարհագրությունն էլ ավելի կընդլայնենք՝ չկենտրոնանալով միայն մայրաքաղաքի վրա»,- հավաստիացրեց Մաթիաս Քիսլերը:
ՍԱՄՎԵԼ ԴԱՆԻԵԼՅԱՆ
«Առավոտ»
18.10.2016
