Եվա Մենդեսը հիշել է իր աղքատ անցյալը
Ծագումով Կուբայից՝ ամերիկացի դերասանուհի, երգչուհի, դիզայներ եւ մոդել Եվա Մենդեսը վերջերս իր ինստագրամի էջում մի լուսանկար է հրապարակել եւ հայտարարել, որ 2001թ. «Ուրիշները» ֆիլմի պրեմիերային կարմիր գորգ էր դուրս եկել ընդամենը 6 դոլարանոց զգեստով, դիմահարդարումն ու սանրվածքն էլ ինքն էր արել, ու դրա վրա առանձնապես գումար չէր ծախսել: Չնայած սրան, նրա «էկոնոմ» կերպարը բավականին տպավորիչ էր ստացվել: Այժմ արդեն հոլիվուդյան աստղն իրեն կարող է շքեղություններ թույլ տալ եւ լավագույն զգեստները պատվիրել ամենահեղինակավոր դիզայներների մոտ, իսկ տարիներ առաջ այդ ամենն իր համար երազանք էր: Աստղը գրել է, որ իր էժանագին զգեստը գնել էր Goodwill բարեգործական խանութից ու այժմ էլ հպարտությամբ հայտարարում է, որ չնայած 6 դոլարանոց հանդերձին, ինքը լավ տեսք է ունեցել եւ ճաշակը երբեք չի դավաճանել:
Իր փոքրիկ գաղտնիքը նա բացահայտել է՝ New York & Company ընկերության համար արվող պատվերներն իրականացնելիս: Եվա Մենդեսն այսօր արդեն ոչ միայն կինոյում է նկարահանվում, այլեւ դիզայներական կարիերա է անում:
Հավելենք, որ Մենդեսը սկզբում նկարահանվել է գովազդային եւ երաժշտական տեսահոլովակներում, ապա հեռուստասերիալներում խաղացել է էպիզոդային դերեր։ Նա ճանաչում է ձեռք բերել «Մարզումների օրը» ֆիլմից հետո, որտեղ արդեն հանդես էր գալիս գլխավոր դերով:
Եվա Մենդեսը նաեւ զբաղվում է մոդելի աշխատանքով, գովազդում է մի շարք հայտնի ընկերությունների ապրանքներ (Cocio կաթնային շոկոլադ, Magnum պաղպաղակ, Revlon, Calvin Klein հագուստ եւ օծանելիք, Cartier զարդեր, Thierry Mugler օծանելիք, Pantene շամպուն, Morgan եւ Peek & Cloppenburg հագուստներ):
Եվան նկարահանվել է «Մարզումների օրը», «Ֆորսաժ 5», «Ուրվական մրցարշավորդը», «Ժամանակից դուրս», «Մի անգամ Մեքսիկայում» եւ այլ ֆիլմերում:
Ըստ https://www.novate.ru-ի
«Առավոտ»
18.10.2016
