«Խարիտոնի» հայ-հունական վոկալ-գործիքային համույթը սեպտեմբերի 26 – 28-ը մասնակցել է Հունաստանում կայացած «Ինտերնացիոնալ ֆոլկլոր» փառատոնին եւ գլխավոր մրցանակ ստացել: Միջոցառմանը մասնակցել են 12 երկրից ներկայացած համույթներ: 20 րոպե հայկական մշակույթն են ներկայացրել, այդքան էլ՝ հունականը:
Հոկտեմբերի 18-ին «Նոյյան տապանում» կայացած ասուլիսը նվիրված էր այդ հաղթանակին: «Խարիտոնի» վոկալ-գործիքային համույթի ղեկավար, ՀՀ ժողովրդական արտիստ, քանոնահարուհի, երաժշտագետ, արվեստագետ, Երևանի պետական կոնսերվատորիայի պրոֆեսոր, «Պատրիդա» հ/կ նախագահի տեղակալ, Հայաստանում հունական հասարակական կազմակերպությունների միության մշակութային կոորդինատոր Անժելա Աթաբեկյանը նշեց, որ ի սկզբանե հինգ քույրերով (երեքը քանոնահարներ, մյուս երկուսը՝ խորմայստեր, տեսաբան-կոմպոզիտոր) 1973-ից սկսած արտասահմանում ներկայացրել են հայկական ֆոլկլյորը:
Իրենց գործունեությունն ավելի ակտիվացել է, երբ 1995-ին Հայաստանում բացվել է հունական դեսպանությունը:
Կարդացեք նաև
Տիկին Աթաբեկյանը նշեց, որ Ուկրաինայում էլ են եղել, այնտեղից էլ ոսկե հուշամեդալ են բերել, համերգներով եղել են նաեւ Ֆրանսիայում, բոլոր ելույթներն ուղեկցվել են հաջողություններով եւ առաջին մրցանակներով: Անժելա Աթաբեկյանի ձեւակերպմամբ, հունական արվեստը, երաժշտությունը, պատմությունը եւ կենցաղը բազմաթիվ զուգահեռներ ունեն հայկականի հետ:
Տիկին Աթաբեկյանը հավելեց, որ շատ ծրագրեր ունեն, սակայն դրանց իրականացմանը խանգարում է ֆինանսական սղությունը, հովանավորների բացակայությունը:
Նա հատուկ շեշտեց, որ իրենք հունական կողմից ավելի գնահատված են, քան հայկականից: ՀՀ ժողովրդական արտիստը չմոռացավ նշել, որ անկախ Հայաստանի երեք նախագահներից միայն Սերժ Սարգսյանն է իր ծննդյան 75-ամյակը շնորհավորել:
Երևանի Կոմիտասի անվան պետական կոնսերվատորիայի պրոֆեսոր Սամվել Գալստյանը նշեց, որ տարվա մեջ 20-30 մասնակցության հրավեր են ստանում: «Ես սիրում եմ հույներին եւ նրանց մշակույթը, հույների, հատկապես՝ Պոնտոսի ափին ապրող հույների եւ համշենահայերի մշակույթների միջեւ ընդհանրություններ կան, նույնիսկ գործիքների նվագակցությունը եւ պարերի շարժումները կարելի է խառնել»,-փաստեց նա:
Պարոն Գալստյանը հայտնեց, որ Հունաստանում զարմացել էին, թե ինչպես են Հայաստանում ապրելով՝ հույները պահպանել իրենց մշակույթը, իսկ հայերը՝ հունարեն բառեր չիմանալով՝ այդքան լավ երգում են հունարեն: Ասաց, որ այնքան ուրախ ծրագիր է եղել, որ իրենց խմբի նվագակցության ժամանակ հանդիսատեսը պարել է:
Սամվել Գալստյանը նշեց, որ վերադարձին իրենց խմբին ընդունել է մշակույթի նորանշանակ նախարար Արմեն Ամիրյանը:
Ասուլիսին մասնակցում էին նաեւ Հայաստանում հունական հասարակական կազմակերպությունների միության նախագահ Արկադի Խիտարովը եւ Հայաստանի և Լեռնային Ղարաբաղի հույների «Պատրիդա» կազմակերպության նախագահ Էդուարդ Պոլատովը:
Էդուարդ Պոլատովն էլ ասաց, թե շատ կցանկանար, որ ԱՊՀ-ում ապրող հույները տեղյակ լինեին իրենց անսամբլի մասին: Հավելեց, որ իրենց ծրագրերում ներգրաված է նաեւ Արցախը: Պոլատովի ձեւակերպմամբ, արցախցի հույների թիվը մի քիչ պակասել է, քանի որ նրանք ժամանակավորապես տեղափոխվել են Հայաստան որովհետեւ կյանքն այստեղ համեմատաբար ավելի լավ է:
Նա, վկայակոչելով իր ընկեր Լեոնիդ Ազգալդյանի խոսքերը, նշեց. «Արցախն էլ Հայաստան է եւ վերջ, իսկ Արցախի հույները Հայաստանի հունական համայնքի մասն են: Եվ էական չէ՝ արցախցի հույնը Հայաստանում է ապրում, թե Արցախում»:
Գոհար ՀԱԿՈԲՅԱՆ
Լուսանկարները՝ nt.am-ի
