«Հոդված 3» մամուլի ակումբում այսօր անդրադառնալով Ստեփանակերտում «Եվրաակումբ» հիմնելու մասին հարցին, Հայաստանում ԵՄ պատվիրակության ղեկավար, դեսպան Պյոտր Անտոնի Սվիտալսկին ասաց. «Այս շաբաթ Հարավկովկասյան տարածաշրջանում ԵՄ հատուկ ներկայացուցիչն այցելելու է Հայաստան: Նրա մանդատի բաղադրիչներից մեկը՝ ՀՀ-ի եւ Ադրբեջանի հասարակության միջեւ վստահության մթնոլորտի ձեւավորումն է»:
Պյոտր Սվիտալսկին նկատեց, որ Եվրամիությունը հատկացնում է գումարներ՝ Ադրբեջանի եւ ՀՀ-ի միջեւ վստահության ձեւավորման ծրագրերի իրականացման համար. «Գիտեմ, որ ԵՄ հատուկ ներկայացուցիչը որոնելու է հնարավորություններ՝ այդպիսի ծրագրեր իրականացնելու համար: Ենթադրում եմ, որ նա ավելի պատրաստ կլինի պատասխանելու այդ հարցին: Իմ մանդատը չի տարածվում մինչեւ Ստեփանակերտ եւ Լեռնային Ղարաբաղ, բայց հուսով եմ, որ առաջիկայում կկարողանանք տեսնել Ղարաբաղի ներսում եւ դրանից դուրս համակողմանի կարգավորում: Այդ համակողմանի կարգավորումը հնարավորություն կտա ԼՂՀ-ի հատկապես երիտասարդությանն օգտագործել այն հնարավորությունները, որոնք կբերի այդ կարգավորումը: Վստահ եմ, որ ԵՄ-ն կաջակցի դրան»:
Անդրադառնալով ՀՀ-ԵՄ ասոցացման համաձայնագրի շուրջ բանակցություններին՝ դեսպանը նշեց, որ հաջորդ շաբաթ բանակցությունների նոր փուլ է մեկնարկելու. «Կարծում եմ՝ երկու կողմերն էլ միտված են վճռորոշ առաջընթացի»:
Ի դեպ, լրագրողների՝ թեմայից դուրս հարցերին ԵՄ դեսպանը հրաժարվեց պատասխանել, եւ միջոցառմանը ներկա երիտասարդների հետ քննարկումը շարունակվեց առանց ԶԼՄ-ների ներկայացուցիչների:
Կարդացեք նաև
Լուիզա ՍՈՒՔԻԱՍՅԱՆ
