«Արցախի խնդրում մեզ համար ամենակարեւորը կարգավիճակի հարցն է: Մեր պատասխանն էլ Ալիեւին հետևյալն է՝ Արցախը որեւիցե կարգավիճակով չի լինելու Ադրբեջանի կազմում։ Խնդիրն ադրբեջանցիների մեջ է։ Եթե փոխզիջում ասելով նկատի ունեն ինքնավար հանրապետություն, ապա տվայտանքների եւ ինքնախաբեության մեջ են։ Փոխզիջումը ԼՂՀ-ի միջազգային ճանաչումն է: Իսկ թե ինչի՞ դիմաց, դա կորոշի Ղարաբաղի իշխանությունն ու ժողովուրդը»,- խորհրդարանում լրագրողների հետ զրույցում ասաց ԱԺ փոխնախագահ Էդուարդ Շարմազանովը:
Հիշեցնենք, նախօրեին ռուսական «Ռոսիա 24»- գործակալության տնօրեն Դմիտրի Կիսելյովին տված հարցազրույցում Ադրբեջանի նախագահ Իլհամ Ալիեւն ասել էր, թե Լեռնային Ղարաբաղը կարող է դառնալ ինքնավար հանրապետություն։
ՀՀ ԱԺ փոխխոսնակը կարծում է, որ Իլհամ Ալիեւը ուղղակի շփոթել է «անկախ» եւ «ինքնավար» բառերը`հավելելով, որ Ալիեւի հայտարարությունը ռուսական լրատվամիջոցների միջոցով անտեղի է, իսկ Արցախի միջազգային ճանաչումը ժամանակի հարց է։
«Եթե Ալիեւը տեղյակ չէ բանակցային սկզբունքներից, ապա տեղեկացնեմ, որ դրանցից մեկը ինքնորոշման իրավունքի իրացումն է։ Այդ մասին իրենց հայտարարություններում ասել են նաեւ Մինսկի խմբի համանախագահ երկրները»,- ասաց ԱԺ փոխխոսնակը`օրինակ բերելով Նախիջեւանի ինքնավար հանրապետության գոյությունը Ադրբեջանի կազմում. «Դա վկայումն է այն բանի, որ մեր ժողովուրդը չի կարող ինքնորոշվել Ադրբեջանի կազմում: Այդ երկիրը Նախիջեւանում անգամ խաչքարերի հանդեպ հանդուրժող չէ, ժողովրդի նկատմամբ ինչպե՞ս կարող է հանդուրժող լինել»:
Կարդացեք նաև
Նելլի ԳՐԻԳՈՐՅԱՆ
