Հայաստան ներթափանցած Ուրալյան ցիկլոնը, որի հետեւանքով հանրապետության մի շարք մարզերում տեղաց առատ ձյուն եւ ճանապարհներ փակվեցին, այսօր կեսօրից հետո կսկսի նահանջել: Այս մասին Aravot.am-ի հետ զրույցում ասաց արտակարգ իրավիճակների նախարարության «Հիդրոմետ» ծառայության օդերեւութաբանության կենտրոնի պետի տեղակալ Գագիկ Սուրենյանը:
Ըստ նրա ցիկլոնը եկել է Ուրալից, արկտիկական օդային զանգվածներով, սակայն այսօրվանից սկսած ցիկլոնի ուժը կրկնակի կթուլանա, ինչի արդյունքում կթուլանա նաեւ տեղումների ինտենսիվությունը:
Պարոն Սուրենյանի տեղեկացմամբ, սակայն տեղումները ժամանակ առ ժամանակ կշարունակվեն` մինչեւ հոկտեմբերի 19-ը ներառյալ:
Կարդացեք նաև
«Հոկտեմբերի 20-ից շրջանների զգալի մասում տեղումները կդադարեն, բայց Լոռիում, Տավուշում, Սյունիքում եւ Արցախում ամպամածությունը, իսկ առանձին հատվածներում նաեւ թույլ տեղումները կպահպանվեն: Վաղը օդի ցածր ջերմային ֆոնը կպահպանվի, սակայն հոկտեմբերի 20-23-ին ջերմաստիճանը հատկապես ցերեկային ժամերին կբարձրանա 4-6 աստիճանով»,-ասաց Գագիկ Սուրենյանը:
Մեր հարցին, թե նոյեմբեր ամսվա համար արդեն կա՞ կանխատեսում, պարոն Սուրենյանը պատասխանեց, որ նոյեմբերին տեղումները նորմայից շատ են սպասվում, իսկ ջերմաստիճանը կլինի նորմայի սահմաններում:
Իսկ թե նոյեմբերը ձյունառատ կլինի թե անձրեւառատ, պարոն Սուրենյանն ասաց, որ նման տեղեկատվություն չեն հաղորդում. «Դա կախված է տեղից, դիրքից, պրոցեսի տեսակից: Տաք ներխուժում կլինի անձրեւ կգա, ցուրտ ներխուժում` ձյուն կգա»:
Լուսինե ԲՈՒԴԱՂՅԱՆ
