Տարիներ ի վեր մասնավորապես մայրաքաղաքի որոշ դպրոցներում ու մանկապարտեզներում տնօրենի պաշտոնը ժառանգաբար է անցնում` մորից աղջկան, սկեսուրից հարսին: Որոշ դպրոցներում էլ ազգակցական կապերով միաժամանակ են ղեկավարում:
Երեւանի կենտրոնում գործող Ալ.Պուշկինի անվան թիվ 8 ավագ դպրոցի տնօրենը Մարիետա Մատղաշյանն էր, որից պաշտոնն անցավ նրա դստերը` Նատալյա Ստեփանյանին, որը ներկայումս հիմնական դպրոցի տնօրենն է: Տիկին Մատղաշյանը այժմ վճարովի դպրոցն է ղեկավարում:
Հիշեցնենք, որ նախորդ շաբաթ վարչապետ Կարեն Կարապետյանը կրթության եւ գիտության ոլորտի պատասխանատուներին հանձնարարեց հանրակրթական հաստատություններում վերջ դնել «մայր ու աղջիկ» ղեկավարելու ավանդույթին:
Այս երեւույթն արմատախիլ անելու համար, վարչապետը ԿԳ պատասխանատուներին մեկ շաբաթ ժամանակ էր տվել: Ըստ նրա, այդ հաստատություններում ազգակցական կապերը, հովանավորչությունը շահերի բախման են բերում:
Կարդացեք նաև
Երեւանի Նիկոլ Աղբալյանի անվան թիվ 19 հիմնական դպրոցի տնօրենն է Լիանա Աշրաֆյանը, որը նախկին տնօրեն Հասմիկ Ղարիբյանի դուստրն է:
Այս ավանդույթը չի շրջանցել նաեւ մարզերի դպրոցները: Արմավիրի մարզի Սարդարապատ գյուղի դպրոցում երկար տարիներ Անահիտ Մանուկյանն է տնօրեն եղել, ապա կրթօջախի տնօրենի պաշտոնը ժառանգել է նրա դուստրը` Կարինե Սմբատյանը:
Թիվ 148 դպրոցի տնօրենը Հերմինե Դավթյանն է, որի եղբայրը նույն դպրոցում է աշխատում:
Մանկապարտեզներում նույնպես ազգակցական կապերով են ղեկավարվում: Արաբկիր համայնքում գործող թիվ 30 մանկապարտեզը պետական է, բայց նույն շենքում գործում է մասնավոր մանկապարտեզ, որի տնօրենը պետական մանկապարտեզի տնօրենի մայրն է:
Թիվ 32 մանկապարտեզը նույնպես պետական է, այստեղ նաեւ տնօրենի մայրն է աշխատում, դուստրը տնօրենն է: Թիվ 33 մանկապարտեզը նույնպես պետական է, որի մի հատվածը մասնավոր մանկապարտեզ է: Աղջիկը պետականի տնօրենն է, մայրը նույն մանկապարտեզի պաշտոնից թոշակի գնացած եւ այժմ մասնավոր մանկապարտեզում է տնօրեն աշխատում:
Թիվ 31 մանկապարտեզում նույնպես մայր ու աղջիկ են աշխատում, մայրը` տնօրենն է:
Լուսինե ԲՈՒԴԱՂՅԱՆ
