Լեհաստանի Կրակով քաղաքում կայացավ Ֆուդոկան կարատեի Եվրոպայի առաջնությունը: Դրան զուգահեռ անցկացվեցին նաեւ WTKF եւ Կուսիկի կարատեների աշխարհի առաջնությունները, որոնք բոլորը եզրափակվեցին «Ռենեսանս» անվանումը ստացած փառատոնով:
Ֆուդոկանի Եվրոպայի առաջնությանը մասնակցում էր նաեւ Հայաստանը՝ ֆեդերացիայի նախագահ Կարեն Ավետիսյանի ղեկավարությամբ: Մեր երկրից տատամի մտան հինգ մարզիկներ ու բոլորն էլ իրենց տարիքային խմբում մեդալ նվաճեցին: 10-11 տարեկանների խմբում Ջոն Երեմյանը արժանացավ երկու բրոնզի, Արման Պետրոսյանը 12-13 տարեկանների խմբում նվաճեց մեկ արծաթե մեդալ: Մեր միակ աղջնակը՝ Հասմիկ Ղազարյանը, 16-17 տարեկանների պայքարում զբաղեցրեց մրցանակային երրորդ տեղը: Մեծահասակների (21-34 տարեկաններ) տարիքային խմբում Տիգրան Մնացականյանը նույնպես բրոնզե մեդալ նվաճեց, իսկ Հայաստանի հավաքականի մարզիչ, սեւ գոտի 4-րդ դան Արծրուն Օհանյանը տուն է վերադառնում չեմպիոնական մեկ ոսկով եւ մեկ բրոնզե մեդալով:
Մրցումների վերջին օրը կայացած «Ռենեսանս» փառատոնը բացեց Հայաստանի ներկայացուցիչ Արծրուն Օհանյանը: Նա աշխարհին առաջին անգամ ներկայացրեց նոր «Կիտե-2» կատան, որի հեղինակը աշխարհում մեծ ճանաչում ու հարգանք վայելող սերբ սենսեյ Իլյա Յորգան է: Aravot.am-ը գրել էր, որ Յորգան վերջերս Հայաստանում գտնվելու օրերին անձամբ էր իր կատան սովորեցրել Արծրուն Օհանյանին եւ միայն նրան վստահել՝ այն առաջին անգամ ցուցադրելու հենց Լեհաստանում, «Ռենեսանս» փառատոնի ժամանակ: Կատայի շնորհանդեսն անցել է հաջող եւ եկող տարվանից մյուս վարպետները այն կկատարեն աշխարհի առաջնության ժամանակ:
Աշոտ ՀԱԿՈԲՅԱՆ
Կարդացեք նաև
Լուսանկարը Aravot.am-ին մրցավայրից տրամադրել է Արմեն Պետրոսյանը
