Երևանի քաղաքապետարանում կայացած աշխատանքային հերթական խորհրդակցության ժամանակ քաղաքապետ Տարոն Մարգարյանը, անդրադառնալով բակերի բարեկարգման տարեկան ծրագրի շրջանակում իրականացվող աշխատանքներին, աշխատակազմի շինարարության և բարեկարգման, իրավաբանական վարչություններին, ինչպես նաև 12 վարչական շրջանների ղեկավարներին հանձնարարել է քննարկել և ներկայացնել այլընտրանքային լուծումներ այն բակերի համար, որտեղ այս կամ այն պատճառով դեռևս չեն կառուցվել խաղահրապարակներ:
«Վերջին տարիներին բակերի բարեկարգման և խաղահրապարակների կառուցման ուղղությամբ մեր կողմից զգալի աշխատանք է իրականացվել: Ամեն տարի բարեկարգվում և ստեղծվում է շուրջ 500 բակային տարածք ու հանգստի գոտի, ինչպես նաև կառուցվում են խաղահրապարակներ: Այս ուղղությամբ առաջիկա տարիներին ևս դեռ անելիքներ ունենք, քանի որ դեռևս կան բակեր, որտեղ խաղահրապարակների կառուցման համար չկան համապատասխան տարածքներ: Այս ընթացքում եղան դեպքեր, երբ բնակիչների համաձայնությամբ մեկ կամ երկու ավտոտնակ ապամոնտաժելով հնարավոր եղավ ազատել համապատասխան տարածք: Սակայն դեռ կան հասցեներ, որտեղ ընդհանրապես ազատ տարածք չկա: Բոլորդ էլ գիտեք, որ սա բավականին լուրջ խնդիր է. մի կողմից գործ ունենք մասնավոր սեփականության, մյուս կողմից էլ բնակիչների՝ բակեր ունենալու արդարացի ցանկության հետ: Եթե որոշ հասցեներում դեռևս չի լուծվել այս խնդիրը, նշանակում է, որ իրավական տեսանկյունից իրավիճակը բավականին բարդ է: Այդ ուղղությամբ պետք է քայլեր ձեռնարկել և նույնիսկ այն հասցեներում, որտեղ չկան համապատասխան պայմաններ, պետք է այլընտրանքային լուծումներ գտնել՝ բակային տարածքներ կառուցելու համար», – ընդգծել է Տարոն Մարգարյանը:
Երևանի քաղաքապետարանի տեղեկատվության և հասարակայնության հետ կապերի վարչություն
