«Սա իրականում ոչ թե ՌԴ ցանկությունն է, որ համանախագահների գործընթացին նոր խաղացող միանա, այլ այն ռուս-թուրքական հարաբերություններն էլ ավելի բարեկամական ցույց տալու նպատակ ունի»,- Aravot.am-ի հետ զրույցում ասաց քաղաքագետ Սերգեյ Մինասյանը՝ մեկնաբանելով ՌԴ ԱԳ նախարար Լավրովի հայտարարությունը:
Հիշեցնենք, որ Սերգեյ Լավրովը հայտարարել էր, թե Թուրքիան կարող է դրական դերակատարում ունենալ ղարաբաղյան հակամարտության կարգավորման հարցում:
«Որովհետեւ հասկանալի է, որ այնպես չէ՝ ՌԴ-ն որոշեց, որ Թուրքիան ԼՂՀ բանակցային գործընթացում դրական դերակատարում ունենա, ու Թուրքիան անմիջապես մտավ ներս՝ առանց ԱՄՆ-ի ու Ֆրանսիայի ցանկությունը հաշվի առնելու: Դեռ խիստ հարց է՝ արդյոք Ֆրանսիան ու ԱՄՆ-ը կցանկանան Թուրքիային տեսնել բանակցային գործընթացում: Եթե Թուրքիան նույնիսկ ՌԴ ցանկությամբ մտնի բանակցային գործընթաց, ապա այդ գործընթացում կցանկանա ներգրավվել նաեւ Իրանը, որովհետեւ ինքն էլ շահագրգռվածություն ունի Անդրկովկասում տեղի ունեցող իրադարձություններում:
Լավրովի այդ հայտարարությունը պետք է դիտարկել որպես ցուցադրական քայլ, տեսեք՝ ռուս-թուրքական հարաբերություններն այնքան են լավացել, որ ՌԴ-ն դեմ չէ ու գտնում է՝ Թուրքիան դրական դերակատարում կարող է ունենալ բանակցային գործընթացում»,- ասաց քաղաքագետը:
Կարդացեք նաև
Պարոն Բադալյանը լուրջ կասկածներ ունի՝ Թուրքիան երբեւէ կարող է ներգրավվել ԼՂ բանակցային գործընթացում. «Խիստ կասկածում եմ՝ ԱՄՆ-ը եւ Ֆրանսիան կողմ կլինեն Թուրքիայի ներգրավմանը, եթե նույնիսկ Հայաստանը ՌԴ ճնշումների ներքո համաձայնի»:
Անդրադառնալով Լավրովի այն կարծիքին, թե Լեռնային Ղարաբաղի հակամարտության կարգավորման գործընթացում առաջընթացը հայ-թուրքական հարաբերությունների կարգավորման համար առանցքային պահ կդառնա՝ քաղաքագետը շարունակեց. «Հայ-թուրքական արձանագրությունները երկու կողմից էլ խափանվեցին, չի բացատրվում, որ եթե ԱՄՆ-ում հաղթի Քլինթոնը, իսկ նա ԱՄՆ-ի այն պետքարտուղարն էր, որի օրոք էր կնքվել հայ-թուրքական արձանագրությունները, ապա հավանաբար, շատ հնարավոր է՝ ԱՄՆ-ը փորձի վերակենդանացնել արձանագրությունները ու իրենց վերահսկողության տակ վերցնել հայ-թուրքական հարաբերությունների բարելավման գործը: Միանշանակ չէ, որ Թուրքիան կհամաձայնի, միաժամանակ դա ձեռք չի տա ՌԴ-ին, որովհետեւ ինքը կցանկանա հայ-թուրքական բարիդրացիական հարաբերությունների հաստատման գործընթացը պահել իր ձեռքում»:
Արփինե ՍԻՄՈՆՅԱՆ
