Վարչապետ Կարեն Կարապետյանի հանձնարարությամբ բոլոր ոլորտներում, այդ թվում նաեւ սպորտում, օպտիմալացման եւ միջոցների արդյունավետ ու նպատակային ծախսման գործընթաց է սկսվել:
Հնարավո՞ր է սպորտում էլ այնպիսի տնտեսումներ անել, որպեսզի խնայվի այնքան միջոց, որը կարելի կլինի ուղղել մասսայական եւ բարձր նվաճումների սպորտում նոր ծրագրեր իրականացնելուն: Վստահ ենք՝ հնարավոր է:
Գաղտնիք չէ, որ մարզական ընկերություններին տարեկան հսկայական գումարներ են հատկացվում, որոնց մի զգալի մասը գնում է ուռճացված աշխատավարձեր վճարելուն:
Մեր գիտենալով, կան այնպիսի երկու մարզադպրոցներ, որոնք ներկայացնում են միեւնույն մարզաձեւը, «նստում են» նույն տարածքում եւ մարզումներ էլ անցկացվում են այդ նույն տարածքում: Այդ երկու մարզադպրոցներն էլ ունեն առանձին հաստիքացուցակ, սկսած տնօրենից, տեղակալներից, ուսմասվարներից, հաշվապահից, մարզիչներից, վերջացրած հավաքարարներով: Դժվար է հավատալ, որ այդ մարզադպրոցներն իրականում գործում են առանձին-առանձին, խմբերի հետ մարզումներն էլ առանձին-առանձին են անցկացնում ու երկուսն էլ շատ կարեւոր են: Դրանք, պարզապես, կարելի է միավորել:
Կարդացեք նաև
Հաջորդը թիմերի եւ հավաքականների մեկնումներն են այս կամ այն երկրում անցկացվող պաշտոնական առաջնություններ եւ միջազգային մրցաշարեր: Ֆեդերացիաները եւ հավաքականները նախապես գիտեն, թե երբ, որտեղ, ինչ մրցում կա եւ որին են մասնակցելու: Հաճախ է պատահում, որ մրցավայր մեկնող հավաքականի համար տոմսերը ձեռք են բերվում մեկնելուց 10-15 օր առաջ: Մինչդեռ, կարելի է տոմսերը պատվիրել ավելի վաղ՝ վճարելով կրկնակի էժան: Այստեղ կարող են հակադարձել, թե հավաքական թիմերի վերջնական կազմերը որոշվում են վերջին օրերին: Դեմ չենք: Բայց չէ՞ որ հավաքականների գլխավոր մարզիչները եւ մարզչական խորհուրդները որպես կանոն նախապես գիտեն թիմի հիմնական կազմը՝ գրեթե 70-80 տոկոս ճշգրտությամբ: Հետեւաբար, կարելի է չէ՞ հիմնական կորիզի տոմսերը նախապես գրեթե կես գնով ձեռք բերել՝ մյուսներինը թողնելով վերջին պահին: Այս դեպքում էլ բավականին խնայողություններ կլինեն, եթե նկատի առնենք տոմսերի թանկությունը:
Աշոտ ՀԱԿՈԲՅԱՆ
