Հայաստանում հոկտեմբերի 13-17-ին հայտարարված է ճապոնական կինոյի հրավառություն: Արդեն 11-րդ անգամ կկայանա Ճապոնական ֆիլմերի կինոփառատոնը:
«Առավոտը» Հայաստանի Հանրապետությունում Ճապոնիայի արտակարգ եւ լիազոր դեսպան Էյջի Տագուչիից (լուսանկարում) հետաքրքրվեց՝ ի՞նչ հայկական ֆիլմ կուզենար, որ դիտեին իր հայրենիքում:
Պարոն դեսպանը հայտնեց, որ քաջածանոթ չէ հայկական ժամանակակից կինոյին, բայց լավ գիտի դասականներին, օրինակ՝ հիացած է Փարաջանովի արվեստով: «Փարաջանովը հրաշալի ռեժիսոր է: Երբեմն Ճապոնիայում կազմակերպվում են փառատոներ, որտեղ տեղ են գտնում նաեւ Փարաջանովի ֆիլմերը: Նա հզոր կինոռեժիսոր է, եւ միշտ ուժեղ տպավորություններ են մնում իր ֆիլմերից»,- հայտնեց ՀՀ-ում Ճապոնիայի արտակարգ եւ լիազոր դեսպանը:
Հետաքրքրվեցինք՝ կա՞ համագործակցություն «Ոսկե ծիրան» երեւանյան միջազգային կինոփառատոնի հետ, որի շրջանակներում տարբեր երկրների լավագույն կինոն «գալիս» է Հայաստան, ու բազմաթիվ երկրների դեսպանատները համագործակցում են երեւանյան այցեքարտային այս կինոփառատոնի հետ:
Կարդացեք նաև
Էյջի Տագուչին հայտնեց, որ 2016-ին «Ոսկե ծիրանը» դիմել էր իրենց՝ ճապոնացի ռեժիսոր եւ սցենարիստ Նաոմի Քավասեին Հայաստան հրավիրելու նպատակով, ու դեսպանատունն էլ պատրաստ էր ֆինանսավորել նրա այցը: Դեսպանի ձեւակերպմամբ, այս անգամ գուցե տեխնիկական պատճառներով բանակցությունները հանգուցալուծում չէին ստացել, բայց իրենք միշտ էլ պատրաստ են աջակցել «Ոսկե ծիրանին»: Նա հավելեց, որ 2015-ին Հայաստանում Ճապոնիայի դեսպանատունը մեկ այլ փառատոնին մասնակցելու համար երկու ճապոնացի ռեժիսոր էր հրավիրել:
Նաոմի Քավասե
Պարոն Տագուչին հավելեց, որ «Ոսկե ծիրանի» շրջանակում մի ֆիլմ էր դիտել 90-ականների Հայաստանի դժվարին տարիների մասին ու շատ էր հուզվել: Նա նշեց, որ շատ կցանկանար, որպեսզի ճապոնացի հանդիսատեսին էլ այդ ֆիլմը հասու լիներ:
Ինչ վերաբերում է Նաոմի Քավասեին, նրա «Ան» ֆիլմով 2015-ին բացվել է Կաննի կինոփառատոնի «Հատուկ հայացք» ծրագիրը: Այս ռեժիսորը 27 տարեկանում դարձել է «Ոսկե տեսախցիկի» անվանակարգի ամենաերիտասարդ դափնեկիրը՝ իր «Սուզակու» ֆիլմի համար: Քավասեի ֆիլմերը տարբեր տարիների մասնակցել են Կաննի փառատոնին, այդ թվում՝ 2003, 2007, 2011 թվականներին:
Բացի Կաննի կինոփառատոնի գլխավոր մրցանակից, նա այլ հեղինակավոր մրցանակներ էլ ունի՝ Լոկառնոյի, Ռոտերդամի կինոփառատոներից:
ԳՈՀԱՐ ՀԱԿՈԲՅԱՆ
«Առավոտ»
14.10.2016
