«Զինատեսակ ունենալը բավարար չէ ասելու համար, որ դու ապահով ես, թեեւ սա քաղաքական ուղերձ է թշնամուդ»,-Երեւանում ընթացող ժամանակակից սպառազինությունների ցուցահանդեսի մասին Aravot.am-ի հետ զրույցում այսպիսի կարծիք է հայտնում ԱԺ պատգամավոր Թեւան Պողոսյանը:
Ըստ նրա՝ պետք է մտածել, թե ինչպիսին պետք է լինեն անվտանգության ամենօրյա ապահովման մեխանիզմները. «Արդյոք այդ սպառազինությունները եւ հնարավորությունները, որոնք այստեղ ցուցադրվում են, ձեռք են բերվելու եւ տեսնելու ենք շատ արագ արդիականացում՝ հագուստից մինչեւ գիշերային դիտարկման սարքեր: Նաեւ պետք է կարողանանք ձեւավորել հետեւյալ իրավիճակը, երբ կասկած չենք ունենա՝ միշտ լինելու են այն հրամանատարները, որոնք ոչ թե սխալներ են թույլ տալու, այլ «դուխով» հրաման են տալու, եւ ցանկացած զինատեսակ, որը պետք է լինելու այդ օրն օգտագործել, օգտագործելու ենք»:
Խնդրեցինք մեկնաբանել Ադրբեջանի նախագահ Իլհամ Ալիեւի՝ վերջերս հնչեցրած աղմկոտ հայտարարությունը, թե իր վրա ճնշում են գործադրում ու ստիպում ճանաչել Արցախի անկախությունը: «Հայկական կողմի համար դա զարմանք չպետք է առաջացնի. մենք միշտ գիտեինք, որ այդ հարցը քննարկվում է: Եթե զարմանում են, թող զարմանան ադրբեջանցիները, որովհետեւ Ալիեւն ինքն էր միշտ ասում, որ նման հարց չկա եւ մտածելու բան չունեն, թե այն կարող է քննարկվել: Իսկ հիմա ասում է՝ «ինձ վրա ճնշում են գործադրում, բայց ես այնքան ուժեղ տղա եմ, որ դիմադրում եմ եւ չեմ ընդունում այդ հարցը»,-հեգնեց Թեւան Պողոսյանը:
Նրա կարծիքով՝ այդպես Ալիեւը փորձում է ոգեշնչել իր հասարակությանը, իսկ միջազգային հանրությանը՝ ասել, որ պատրաստ է հարցը ռազմական ձեւով լուծելու. «Կարծում եմ՝ այստեղ ավելի շատ միջազգային հանրությունը խնդիր ունի կատարելու, երբ հավասարության նշան դնող անատամ հայտարարություններ է անում: Իսկ հայկական կողմը պետք է մտահոգվի իր տնտեսության զարգացմամբ»:
Կարդացեք նաև
Անդրադառնալով հայկական կողմի ձեռք բերած «Իսկանդերներ»-ին, մեր զրուցակիցն ասաց. «Դրա համար վճարվել է: Կարեւոր չէ՝ վճարվել է կե՞ս գին, 1/3-ը, թե 100 տոկոսը, դրանք այլեւս հայկական են՝ մերն են»:
Պատգամավորը չի կիսում տեսակետը, թե հայկական կողմը չի կարող կիրառել այդ զենքը. «Որ մի բան չեք իմանում՝ պետք չի խոսել: Շատ մարդիկ հոլիվուդյան ֆիլմեր կարող են նայել եւ դրանց սցենարներով ոգեշնչվել: Գիտակցենք՝ ի՞նչ է՝ մեր բանակը չէ՞ր հասկանում, որ եթե չի օգտագործելու այդ զենքը, ցուցադրելն իմաստ չունի…»:
Լուիզա ՍՈՒՔԻԱՍՅԱՆ
