«Հայաստանի համար առեւտրատնտեսական ոլորտում խոշոր գործընկերը Ռուսաստանն է, ու մենք մտադիր ենք առաջիկայում էլ ավելի մեծ տեղ տալ հայ-ռուսական հարաբերությունների զարգացմանը: ՌԴ-ն հիմնական ներդրողն է Հայաստանի տնտեսության մեջ: Ռուսական ներդրումներն արդեն կազմում են չորս միլիարդ ԱՄՆ դոլար»,- Երեւանում ընթացող Եվրասիական գործընկերության առաջին միջազգային համաժողովի ժամանակ հայտարարեց Ռուսաստանի Դաշնության տրանսպորտի նախարար Մաքսիմ Սոկոլովը:
ՌԴ պաշտոնյայի խոսքով, իրենք մեծ ուշադրություն են դարձնում հատկապես միջպետական հարաբերությունների զարգացմանը, ուստի ակնկալում են, որ եվրասիական տնտեսական միության անդամ պետությունների միջև համագործակցությունը կմեծանա, կապերն էլ`կխորանան:
Հայ-ռուսական հարաբերությունների խորացման համատեքստում, ռուսաստանցի պաշտոնյան ասաց`աշխատանքներ են տարվում Ռուսաստանը Հայաստանին կապող միակ ցամաքային ճանապարհով՝ Վերին Լարսով, բեռնափոխադրումները հեշտացված կարգով իրականացնելու ուղղությամբ:
Կարդացեք նաև
Նա հավելեց նաեւ, որ երկու երկրներն ակտիվ համագործակցում են միասնական տրանսպորտային քաղաքականություն վարելու, բաց երկնքի հաստատման ուղղությամբ:
Համաժողովին ներկա էին եւ բացման խոսքով հանդես եկան Հայաստանի գործող վարչապետ Կարեն Կարապետյանը եւ նախկին վարչապետ`Եվրասիական տնտեսական հանձնաժողովի նախագահ Տիգրան Սարգսյանը: Նրանք ողջունեցին համաժողովի աշխատանքները`արդյունավետ աշխատանք եւ իբրեւ լավագույն արդյունք`ձեռք բերված պայմանավորվածություններ: Եվ Կարեն Կարապետյանը, եւ Տիգրան Սարգսյանը հրաժարվեցին լրագրողների հարցերին պատասխանել:
Համաժողովին ներկա էր նաեւ ՀՀ նախկին վարչապետ Արմեն Դարբինյանը: Նկատենք, որ նրա ղեկավարած կառավարությունը եւս արհեստավարժների կառավարություն էր, ինչպես Կարեն Կարապետյանի ձեւավորած կառավարությունը: Այս առիթով Aravot.am-ը Արմեն Դարբինյանին խնդրեց որոշ հարցերի պատասխանել: Պարոն Դարբինյանը եւս հրաժարվեց`ասելով, որ չի խախտելու իր «լռության ուխտը»:
Նա հրաժարվեց պատասխանել նաեւ երեկ`ՀՀ առաջին նախագահ Լեւոն Տեր Պետրոսյանի`տնտեսական դեֆոլտի կանխատեսմանը վերաբերվող հարցին: «Ես բոլոր կարծիքների հետ համամիտ եմ, բոլոր կարծիքներն էլ գոյության իրավունք ունեն, հարցազրույց էլ չեմ տալիս»,- ասաց նա:
Նելլի ԳՐԻԳՈՐՅԱՆ
