Քիչ առաջ Եվրոպայի խորհրդի խորհրդարանական վեհաժողովի (ԵԽԽՎ) լիագումար նիստին միջադեպ տեղի ունեցավ ԵԽԽՎ-ում ադրբեջանական պատվիրակության անդամ Ռաֆայել Հուսեյնովի և հայկական պատվիրակության անդամների միջև:
Ռաֆայել Հուսեյնովը ազատ դեբատների ընթացքում ԵԽԽՎ ամբիոնից հայտարարեց, թե իբր Հայաստանի Հելսինկյան ընկերակցության նախկին նախագահ, իրավապաշտպան Միքայել Դանիելյանը սպանվել է ՀՀ իշխանությունների ձեռքով` ազատության համար: Ադրբեջանցի պատվիրակը հայտարարեց, թե «Սերժ Սարգսյանի ձեռքերն արյունոտ են, և այն մի քանի լրագրողները, որոնք ազատ են խոսում, ոչնչացվում են»:
ԵԽԽՎ-ում հայկական պատվիրակության անդամ Նաիրա Կարապետյանն իր ելույթում կարճ հակադարձեց Հուսեյնովին, այնուհետև խոսեց ԵԽԽՎ-ի` կոռումպացված լինելու մասին` վկայակոչելով ԵԺԿ խմբակցության նախկին նախագահ Լուկա Վոլոնտեի հարցը, որը Միլանի դատախազության կողմից 2012-2014 թթ. Ադրբեջանի օգտին քաղաքական գործունեություն ծավալելու համար է մեղադրվում:
ԵԽԽՎ նախագահ Պեդրո Ագրամունտն ընդհատեց հայ պատվիրակին` պատճառաբանելով, թե դատական գործընթացի տակ գտնվող գործի մասին իրավունք չունի խոսել:
Կարդացեք նաև
Այս միջադեպին հաջորդեց ԵԽԽՎ-ում հայկական պատվիրակության անդամ Նաիրա Զոհրաբյանի ելույթը, որի ընթացքում տիկին Զոհրաբյանը հայտարարեց, թե Ռաֆայել Հուսեյնովին առաջարկում է դիմել հոգեբույժի: Դրանք արձագանքեց ԵԽԽՎ նախագահ Պեդրո Ագրամունտը` «Կարգի եմ հրավիրում ձեզ, վիրավորանքներ մի հասցրեք Վեհաժողովում»:
Տիկին Զոհրաբյանը շարունակեց ելույթը: Ագրամունտն ասել էր. «Կարող եք շարունակել, սակայն խնդրեմ՝ վիրավորանքներ մի հասցրեք»: Եվ հետո անջատեց նրա բարձրախոսը` հայտարարելով, թե իրավունք չունեք նման բաներ ասելու, զրկվում եք ձայնից: Տիկին Զոհրաբյանն էլ, թե Դուք էլ իրավունք չունեք ինձ ընդհատելու, քանի որ Դուք ևս Ադրբեջանի կողմից կաշառված լոբբիստ եք և դրա համար ձեզ ձեռք չի տալիս, որ այս ամբիոնից հնչի մեկ այլ կաշառված գործչի մասին:
Այս վիճաբանությանը միջամտեց նաև ԵԽԽՎ-ում հայկական պատվիրակության անդամ Միքայել Մելքումյանը` հայտարարելով, որ Ագրամունտն իրավունք չունի լռեցնելու անկախ պատգամավորի:
Տաթև ՀԱՐՈՒԹՅՈՒՆՅԱՆ
