Այսօր «Մարիոթ Արմենիա» հյուրանոցում կազմակերպված Եվրասիական գործընկերության միջազգային համաժողովին, ի տարբերություն ՀՀ վարչապետ Կարեն Կարապետյանի եւ նախկին վարչապետ եւ ներկայումս Եվրասիական տնտեսական հանձնաժողովի խորհրդի նախագահ Տիգրան Սարգսյանի, Հայերի համաշխարհային կոնգրեսի նախագահ Արա Աբրահամյանը ելույթ ունեցավ հայերեն:
Եվ քանի որ համաժողովի աշխատանքային լեզուն ռուսերենն էր, Ռուսաստանի Դաշնության տրանսպորտի նախարար Մաքսիմ Սոկոլովը, չկանխատեսելով, որ հայերեն ելույթներ էլ կլինեն, Արա Աբրահամյանի երկարաշունչ ելույթին հետեւեց առանց թարգմանչական սարքի:
Երբ պարոն Աբրահամյանը վերջացրեց ելույթը, կրկին հայերենով դիմեց Մաքսիմ Սոկոլովին` կատակելով. «Ոչինչ չհասկացաք չէ՞»,-պարոն Սոկոլովը կրկին չհասկացավ եւ քաղաքավարությունից ելնելով` ժպտաց:
Ապա Արա Աբրահամյանը կրկին հայերենով ասաց` «Այ, ես էլ, երբ ինչ- որ տեղ եմ գնում եւ խոսում են այնպիսի լեզուներով, որ չեմ հասկանում, ձեր պես դեմքիս այնպիսի լուրջ արտահայտություն եմ տալիս, թե իբր հասկանում եմ»:
Արա Աբրահամյանի այս կատակը ծիծաղ առաջացրեց ներկաների մոտ:
Կարդացեք նաև
Կարեն Կարապետյանը, որը նույնպես լիաթոք ծիծաղեց, ստիպված եղավ մի երկու բառով Մաքսիմ Սոկոլովին թարգմանել` ինչն ինչոց է:
Լուսինե ԲՈՒԴԱՂՅԱՆ
