«Եթե դու ընդդիմադիր ուժ չես ստեղծում օբյեկտիվորեն, իշխանությունն է ստեղծում: Ես կուզենայի, որ իրենց կիրքը մի քիչ չափավոր լիներ: Եղածը հերիք է»,- այսօր «Հայելի» ակումբում ՀՀԿ-ին առաջարկեց քաղաքագետ Լեւոն Շիրինյանը:
Խոսելով Վիկտոր Դալլաքյանի հայտարարության մասին, որ եկել է իմ՝ քարեր նետելու ժամանակը՝ քաղաքագետն ասաց. «Թող նետի, էլի: Բոլորն ասում են՝ բա 4 տարի որտե՞ղ էիր թաքնվել, որ քար էիր հավաքում: Ընդհանրապես նախագահի աշխատակազմում քար չեն հավաքում, ես Քոչարյանի ժամանակ աշխատել եմ նախագահականում: Այնտեղ կամ 4 տարի աշխատում են կամ չեն լինում: Հիմա եկել ի՞նչ է ասում: Եթե 4 տարի չես դիմել, թե ընկեր ջան, ինձ ինչի՞ ես պահում այստեղ, աշխատավարձից էլ չի հրաժարվել, ուրեմն Հարկային տեսչությունը պետք է այդ փողերը հետ ուզի: Բա ի՞նչ ես արել, հնարավո՞ր է դասախոս պահեմ, որը լսարան չմտնի: Հաջորդ օրը կասեմ՝ գնա, աշխատավարձ չեմ տա»:
Հարցին՝ Բաղրամյան 26-ի՞ց են նրան գործուղել՝ Շիրինյանը պատասխանեց. «Կարող է գործուղել են, դա լավ բանի մասին չի խոսում: Իսկ եթե չեն գործուղել, դուք դրսեւորել եք պատեհապաշտ քաղաքական վարքագիծ: Հիմա կտեսնենք, դուք պատրա՞ստ եք Դալլաքյանի կուսակցության անդամ դառնալ: Եթե միտինգները թողեցին՝ ՀՀԿ-ից գործուղել են, եթե չթողեցին, պլակատները պոկեցին, գողացան, ուրեմն՝ չէ»:
Քաղաքագետը նաեւ մի առաջարկ ներկայացրեց վարչապետ Կարեն Կարապետյանին՝ տնտեսական համաներում՝ օլիգարխիայի համար՝ պայմանով, որ գումարները ներդնեն արդյունաբերության մեջ. «Եթե ոչ՝ քրեական հետապնդում թող սկսեն բոլորի հանդեպ՝ Լեւոն Տեր-Պետրոսյանի շրջանից սկսած: Սա պետք է անի անպայման, որ Հայաստանը շարժվի: ԱԱԾ-ն տեղը գիտի, թե ովքեր են հարուստները»:
Կարդացեք նաև
Հռիփսիմե ՋԵԲԵՋՅԱՆ
