«Իմ ծնողները բժիշկներ են եղել, ես գործարար եմ, բայց որպես բժիշկների ընտանիքում մեծացած մարդ, իմ պատկերացմամբ, տնտեսությունը արյուն է, որը պետք է ազատ շրջանառվի ու սնուցի օրգանները: Հենց սրանով է պայմանավորված ԵՏՄ կարևորությունը, դա ամբողջ մայրցամաքի ամբողջության գրավականն է: ԵՏՄ-ից կշահեն բոլոր գործարարները, ներդրողները, նրանք, ովքեր կմիանան մեզ ապագայում»,- այս պատկերավոր համեմատությունն արեց այսօր Երեւանում ընթացող Եվրասիական գործընկերության առաջին միջազգային համաժողովի ժամանակ Ռուսաստանում հայերի միության նախագահ Արա Աբրահամյանը:
Այսպիսով, ըստ նրա, Եվրասիան սկսում է գիտակցել, որ ինքը ոչ միայն աշխարհագրական, այլեւ՝ միասնական տնտեսական տարածաշրջան է, կենդանի օրգանիզմ:
Արա Աբրահամյանը վստահ է` եթե ԵԱՏՄ անդամ պետությունները միավորվեն, կունենանք բարգավաճող տարածաշրջան. «Հայաստանը ձգտում է դառնալ ԵԱՏՄ, ապագայում նաեւ Կենտրոնական Ասիայի տեխնոլոգիական կենտրոնը, դառնալով Մետաքսի ճանապարհի դարպասը: ՀՀ-ն կդառնա աշխույժ խաչմերուկ: Ես լավատեսորեն եմ նայում ԵԱՏՄ ապագային եւ դա անում եմ սթափ, առանց վարդագույն ակնոցի»: Նա կարծում է, որ տնտեսություններն են միավորում պետություններին, ոչ թե քաղաքականությունը:
Հայաստանի սահմանները հարեւան երկու պետությունների հետ փակ են, ինչը դժվարացնում է տնտեսության զարգացումը: Արա Աբրահամյանը դա լավ է հասկանում: Բայց`լավատես է:
Կարդացեք նաև
Ավելի ուշ լրագրողների հետ զրույցում, նա խոսեց Հայաստանի տնտեսության մասին: Ասաց, որ դժվար է, բայց լավ կլինի, եթե միավորվենք: Նախկին վարչապետի պաշտոնանկությանը վերաբերվող հարցին ասաց, որ Հովիկ Աբրահամյանն արել է այն, ինչ կարողացել է:
Կարեն Կարապետյանի հետ հույսեր կապելու մասով էլ ասաց` պետք է միանանք եւ միասնական խնդիրները լուծենք: Նա կարծում է, որ սփյուռքի ներուժը ամբողջությամբ չի օգտագործվում: Երեկ առաջին նախագահը խոսել էր Հայաստանին սպառնացող տնտեսական աղետից: Արա Աբրահամյանն ասում է`ամեն ինչ էլ կլինի, եթե չմիավորվենք:
Իր քաղաքական ծրագրերին վերաբերող հարցերից Արա Աբրահամյանը խուսափեց, հեռացավ: Միայն ասաց, որ դրանք շարունակվում են:
Այլ մանրամասները`տեսանյութում
Նելլի ԳՐԻԳՈՐՅԱՆ
