«Իր աճի տեմպերով Հայաստանն արդեն իսկ եվրասիական ինտեգրացիայի կենտրոն է եւ արդարացնում է համարձակ ակնկալիքները»,- այս կարծիքին է ՌԴ նախագահի՝ տարածաշրջանային տնտեսական ինտեգրացման հարցերով խորհրդական Սերգեյ Գլազեւը: Իր կարծիքը նա բարձրաձայնեց այսօր Երեւանում ընթացող Եվրասիական տնտեսական միջտարածաշրջանային առաջին ֆորումի ժամանակ:
Նա նկատեց, որ Հայաստանում շատ էին թերահավատները, որ անդամակցելով Եվրասիական տնտեսական միությանը՝ Հայաստանը չի զարգացնի իր տնտեսությունը: «ՀՀ անդամակցությունը ԵՏՄ-ին, սակայն, հակառակն է ապացուցում, որովհետեւ Հայաստանից ապրանքների արտահանումը 70 տոկոսով մեծացել է: Սա հիանալի արդյունք է: Ռեկորդային: Ուստի, ես կարծում եմ, որ Հայաստանը կարող է դառնալ եվրասիական ինտեգրացիայի կենտրոնը»:
ՌԴ նախագահի խորհրդականը նշեց, Հայաստանը լավ օրինակ է ԵՏՄ անդամ-պետությունների համար` ազգային արտադրության արտահանմամբ` գյուղատնտեսական մթերքներից մինչև տեխնոլոգիական ապրանքատեսակներ:
Կարդացեք նաև
Ավելի ուշ, համաժողովի շրջանակներում կայացած մամուլի ասուլիսում լրագրողները պարոն Գլազեւից հետաքրքրվեցին`ռուս-թուրքական տնտեսական վերջին մերձեցումներն արդյոք չե՞ն վնասի Հայաստանին`նկատի ունենալով հայ-թուրքական չկարգավորված, կնճիռներով եւ հայ-ռուսական ռազմավարական հարաբերությունները: Սերգեյ Գլազեւը նկատեց, որ ռուս-թուրքական տնտեսական ծրագրերը «վերակենդանացվող» ծրագրեր են, որոնք սառեցվեցին ռազմավարական մոտիվներով: Նա վստահ է, որեւէ կերպ դա չի կարող շոշափել, առավել եւս վնասել Հայաստանի շահերին:
Նելլի ԳՐԻԳՈՐՅԱՆ
