Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի լիագումար նիստում այսօր ընթացավ «Իրավիճակը Թուրքիայում պետական հեղաշրջման փորձի լույսի ներքո» թեմայով քննարկում:
Հայկական պատվիրակության անդամները՝ ՀՀԿ խմբակցության պատգամավոր Սամվել Ֆարմանյանը, ՀՅԴ խմբակցության ղեկավար Արմեն Ռուստամյանը հանդես եկան առաջարկով Թուրքիային վերադարձնել մոնիտորինգի տակ:
ԵԽԽՎ-ում հայկական պատվիրակության ղեկավար Հերմինե Նաղդալյանը, թեև հերթագրված էր, նրա հերթը չհասավ՝ ելույթ չունեցավ, սակայն նրա ելույթն ընդգրկվել է նիստի արձանագրության մեջ: Ելույթի գրավոր տեքստում, մասնավորապես արձանագրված է. «Բոլորովին վերջերս քննարկում էինք Թուրքիայում ժողովրդավարական ինստիտուտների գործունեությանն առնչվող հարցը: Ինչպես հիշում եք, քննարկումների ընթացքում տարբեր տեսակետներ հնչեցին. մենք խիստ մտահոգված էինք երկրում տեղի ունեցող սխալ զարգացումներով եւ պաշտպանում էինք մոնիթորինգի գործընթացը վերականգնելու գաղափարը: Այսօր այդ հարցն առավել քան հրատապ է` պայմանավորված կտրուկ շրջադարձով, որը Թուրքիան կատարեց իր ժողովրդավարացման ճանապարհին»:
Կարդացեք նաև
Aravot.am-ը ԵԽԽՎ-ում հայկական պատվիրակության անդամ Նաիրա Կարապետյանից, ով ներկա էր նիստին, հետաքրքրվեց՝ ինչպե՞ս է վեհաժողովն ընդունել հայ պատվիրակների այս առաջարկը: Նա պատասխանեց՝ ծափահարություններով:
Տաթև ՀԱՐՈՒԹՅՈՒՆՅԱՆ
