Վերաքննիչ քրեական դատարանում հոկտեմբերի 13-ին քննվում էր «Սասնա ծռեր» խմբավորման անդամ Պավլիկ Մանուկյանի կալանքի երկարացման հարցը:
Նրա պաշտպան Ինեսսա Պետրոսյանը լրատվամիջոցներին հայտնեց, որ դատական նիստը հետաձգվել է, քանի որ Պավլիկ Մանուկյանը դատական նիստին չէր մասնակցել: Պաշտպանական կողմը միջնորդություն է ներկայացրել, որպեսզի Մանուկյանը մասնակցի նիստին. «Վերջինս մեզ հետ առանձին տեսակցությունների ընթացքում հայտնել էր իր կամքը, որ ցանկանում է մասնակցել բողոքի քննությանը: Վերաքննիչ դատարանը որոշում կայացրեց բավարարել մեր ներկայացրած միջնորդությունը: Դատական նիստը հետաձգվեց մինչեւ երկուշաբթի 16:00-ն»:
Ինեսսա Պետրոսյանը նշեց, որ Պավլիկ Մանուկյանը լուրջ առողջական խնդիրներ ունի. «Վերջին մեր տեսակցությունները որոշակի տագնապ են առաջացնում պաշտպանական կողմի մոտ, որովհետեւ հետվիրահատական շրջանը, իմ կարծիքով, ոչ այդքան հարթ է անցնում՝ ցավերը փոխարեն մեղմվեն՝ ավելին են սաստկանում: Ռենտգեն հետազոտությունից հետո ինքն է այդ տեղեկատվությունը տվել, որ որոշակի խնդիրներ կան իր ծնկում ոսկրերի հետ կապված»:
Ամի ՉԻՉԱԿՅԱՆ
