Այսօր առավոտյան Գյումրու 102-րդ ռազմաբազայի մոտակայքում դանակահարել են ռուս զինծառայող՝1992 թվականին ծնված Ա. Ռ.-ին։ Վերջինս առավոտյան ժամը 07.30-ի սահմաններում դիմել է Գյումրի բժշկական կենտրոն։
Գյումրի բժշկական կենտրոնի մամլո ծառայությունից տեղեկացնում են, որ նրա մոտ ախտորոշվել է աջ թոքակողի կտրած-ծակած վերք, կյանքին էլ վտանգ չի սպառնում։
Թե ո՞վ է դանակահարողը, դեռ չեն նշում, Շիրակի մարզային ոստիկանությունից միայն փոխանցեցին, որ դեպքը տեղի է ունեցել ոչ թե ռազմաբազայի տարածքում, այլ մոտակա հատվածում, վիճաբանություն է տեղի ունեցել ռուս զինծառայողների միջև, որն էլ ավարտվել է դանակահարությամբ։
Ի դեպ, երեկ երեկոյան էլ մեկ այլ դանակահարության դեպք էր տեղի ունեցել Գյումրիում, ժամը 20.35-ի սահմաններում Գյումրի բժշկական կենտրոն էին տեղափոխել 1986 թվականին ծնված Վ. Ս.-ին, որի մոտ ախտորոշվել է կրծքավանդակի վնասվածք, չթափանցող վերքեր՝ ձախ կեսի շրջակայքում։ Նրա առողջական վիճակը գնահատվում է բավարար։ Ոստիկանությունից փոխանցեցին, որ կասկածյալը ՝ Ա.Մ.-ն, ձերբակալվել է հենց երեկ, վերջիններս միասին կերուխում են արել, որն էլ ավարտվել է դանակահարությամբ։
Կարդացեք նաև
Քիչ առաջ էլ Աղին գյուղի բնակիչներից մեկը՝ 84-ամյա մի տղամարդ է փորձել վերջ դնել իրեն կյանքին։ Նրան հիվանդանոց են տեղափոխել սուր շնչառական անբավարարությամբ, բժիշկները կարողացել են փրկել նրա կյանքը, այժմ ծանր առողջական վիճակով գտնվում է վերակենդանացման բաժանմունքում։ Նա, ըստ մեր տեղեկությունների, նման քայլի է դիմել այն պատճառով, որ տառապում է քաղցկեղով ու չի ուզում նեղություն տալ ընտանիքի անդամներին, հոգս դառնալ նրանց համար։
Նունե ԱՐԵՎՇԱՏՅԱՆ
