Այսօր մամուլում հրապարակումներ են տարածվել այն մասին, որ նոյեմբերին տեղի է ունենալու ԲՀԿ արտահերթ համագումար, որի ժամանակ ԲՀԿ-ն կանոնադրությամբ նոր պաշտոն է ստեղծելու` ԲՀԿ քաղաքական խորհրդի նախագահ, և հենց այդ համագումարում էլ ԲՀԿ քաղաքական խորհրդի նախագահ է դառնալու Գագիկ Ծառուկյանը, իսկ Նաիրա Զոհրաբյանը մնալու է ԲՀԿ նախագահի պաշտոնում:
Aravot.am-ը ԲՀԿ խմբակցության քարտուղար Վահե Էնֆիաջյանից հետաքրքրվեց` օրակարգային նման հարց կա՞, պարոն Էնֆիաջյանը պատասխանեց. «Նման տեղեկություն հրապարակելուց առաջ բարդ չէր լինի բացել ԲՀԿ կանոնադրությունը և տեսնել, որ ստեղծման օրվանից` 2006-ից, մեր կանոնադրությամբ արդեն ամրագրված են եղել ԲՀԿ նախագահի և քաղաքական խորհրդի նախագահների պաշտոնները: Նախկինում ԲՀԿ նախագահն ու քաղխորհրդի նախագահը Գագիկ Ծառուկյանն էր, այժմ Նաիրա Զոհրաբյանը»:
Դառնալով Գագիկ Ծառուկյանի` քաղաքական խորհրդի նախագահի պաշտոնը զբաղեցնելու մասին հրապարակումներին` Վահե Էնֆիաջյանը պարզաբանեց. «Երբ պարոն Ծառուկյանը որոշում կայացնի վերադառնալ քաղաքականություն, նա կրկին կլինի թե՛ ԲՀԿ նախագահ, թե՛ քաղական խորհրդի նախագահը, դա նաև Նաիրա Զոհրաբյանի ցանկությունն է»:
Տաթև ՀԱՐՈՒԹՅՈՒՆՅԱՆ
