Այսօր Ստրասբուրգում ընթացող Եվրոպայի խորհրդի խորհրդարանական վեհաժողովի (ԵԽԽՎ) լիագումար նիստի ընթացքում Թուրքիայի արտաքին գործերի նախարար Մևլութ Չավուշօղլուի ելույթը եվրոպացի պատվիրակները քմծիծաղով են ընդունել:
Թուրքիայի ԱԳ նախարարը նաև անդրադարձել էր ղարաբաղյան հակամարտության թեմային` հայտարարելով, թե Ռուսաստանն առաջարկում է հայերի` հինգ շրջաններից հեռացման տարբերակը:
Aravot.am-ը ԵԽԽՎ-ում հայկական պատվիրակության նախագահ Հերմինե Նաղդալյանից հետաքրքրվեց` այս հարցով ո՞րն է հայկական պատվիրակության դիրքորոշումը և արդյոք չե՞ն հակադարձելու Չավուշօղլուի պնդումներին: Տիկին Նաղդալյանը փոխանցեց. «Հետագայում մեր ելույթների ընթացքում հարմար պահի անպայման կհակադարձենք, քանի որ նրա հետ հարցուպատասխանն այդ ձևաչափը չէր ենթադրում»: Տիկին Նաղդալյանը փաստեց, որ Չավուշօղլուն հիմնականում շրջանցել է պատվիրակների հարցերը. «Օրինակ` այնպիսի տպավորություն ստեղծվեց դահլիճում, որ Չավուշօղլուն Լոզանի պայմանագրին ընդհանրապես տեղյակ չէ»:
Տիկին Նաղդալյանը ծիծաղով նշեց, թե հետաքրքրական էին նաև Թուրքիայի ԱԳ նախարարի զեղումները կապված իրենց ընտանեկան բանավեճերի հետ, որոնք նրա բնորոշմամբ` իբր արտացոլում են համաշխարհային քաղաքական մտքի զարգացումները:
Կարդացեք նաև
Ըստ տիկին Նաղդալյանի` Չավուշօղլուի հետ հարցուպատասխանն արդեն իսկ ձևավորում է այն վերաբերմունքը, որ պիտի ունենանք նաև ղարաբաղյան հարցի վերաբերյալ իր պատասխանի մասով:
Հերմինե Նաղդալյանը հավելեց. «Մինսկի խմբի և ընթացող բանակցությունների գլխավոր հարցը ԼՂ ժողովրդի ինքնորոշման իրավունքն է: Իսկ Թուրքիային ասվել է, որ լավագույնը, ինչ կարող են անել, հնարավորինս հեռու մնալն է Ղարաբաղի խնդրի լուծման գործընթացից»:
Մեր այն դիտարկմանը, թե, այնուամենայնիվ, Չավուշողլուն օգտագործեց հարթակը իր ասելիքը տեղ հասցնելու համար, տիկին Նաղդալյանն արձագանքեց. «Մեկ ժամ խոսեց, բայց, համենայն դեպս, նրա խոսքը լսողների մոտ քմծիծաղով ընդունվեց»:
ԵԽԽՎ-ում տարբեր քննարկումների ժամանակ փաստվել է, որ ՀՀ-ն ԵԽԽՎ-ի լավագույն գործընկերն է և ավելին, Ադրբեջանում սահմանադրական հանրաքվեն դիտարկվել է Հայաստանում անցկացված հանրաքվեի հետ հակադրության մեջ:
Հիշեցմանը, թե ԵԽԽՎ ամբիոնից հայտարարվեց Երևանում Էրեբունիում` ՊՊԾ գնդի տարածքում տեղի ունեցածը, և հարցին` արդյոք դա չի՞ ստվերում ՀՀ-ում գրանցված դրական զարգացումները, տիկին Նաղդալյանը պատասխանեց. «Այդ հարցը բարձրաձայնվել է ոչ թե մի որևէ եվրոպացի պատվիրակի, կամ կառույցի ղեկավարի կողմից, այլ ադրբեջանական պատվիրակության անդամի կողմից`որպես արդարացում: Ոչ մեկ ականջալուր չեղավ, ոչ էլ շարունակեց այդ թեման»:
ԵԽԽՎ-ում հայկական պատվիրակության անդամ Նաիրա Կարապետյանը Չավուշօղլուի ելույթի մասին ասաց. «Թուրքիայի ԱԳ նախարարն անազնիվ էր ԵԽԽՎ-ի հետ ոչ միայն Հայաստանին վերաբերող մասում, այլև ամբողջ իր ելույթում և հարցերի պատասխաններում։ Նա բացահայտ ստում էր` աղավաղելով շատ փաստեր, ինչը քմծիծաղ էր առաջացնում ներկաների մոտ։ Միակ ճշմարտությունը Սամադ Սեիդովի հետ հարցուպատասխանի ընթացքում փոխադարձ ջերմ և անդավաճան սիրո խոստովանությունն էր։ Չմոռանանք նաև իր և իր կնոջ հարաբերություններն իբրև Թուրքիայի պետականաշինության հիմնաքար։ Իսկ եթե ավելի կոնկրետ, Թուրքիայի ԱԳ նախարարը գերազանցում է իր իրավունքները և ամեն անգամ փորձում Արցախի հիմնախնդրի հարցում իրեն վերապահել մի դեր, որ որևէ միջազգային փաստաթղթով նրան տրված չէ»:
Տաթև ՀԱՐՈՒԹՅՈՒՆՅԱՆ
