«Կոնգրես» հյուրանոցում Արիաննե Կաուլիի շախմատային բարեգործական միաժամանակյա խաղի ժամանակ անսպասելի սրաh մտավ հայկական շախմատի առաջատար Լեւոն Արոնյանը:
Նա Երեւան է եկել Մոսկվայից, որտեղ Միխայիլ Տալի հուշամրցաշարում 5,0 միավորով զբաղեցրել էր երրորդ հորիզոնականը: Լրատվամիջոցների ներկայացուցիչների հետ հանպատրաստից զրույցում Արոնյանը թվարկեց այս եւ հաջորդ տարի նախատեսվող իր մասնակցությամբ գերհզոր մրցաշարերը, գնահատեց Միխայիլ Տալի հուշամրցաշարում ցույց տված իր արդյունքները:
Հարցին, թե շարունակելո՞ւ է պայքարել աշխարհի չեմպիոնի տիտղոսը նվաճելու համար, շախմատիստը պատասխանեց. «Եթե դրա համար չպայքարեի, շախմատ ուղղակի չէի խաղա: Դրա մեջ եմ տեսնում իմ շախմատ խաղալու իմաստը: Վերջին մրցաշարերում, կարծես, վատ չեմ խաղում: Միավորներս շատ չեն՝ ավելի պետք է հավաքեմ, բայց տենդենցիան լավն է, լավ դիրքեր շատ եմ ստանում»:
Aravot.am-ի հարցին, թե օրերս Խանտի Մանսիյսկում աշխարհի պատանիների չեմպիոնի կոչումը նվաճած Հայկ Մարտիրոսյանի եւ Մանուել Պետրոսյանի մեջ ինքը ապագա Արոնյանների տեսնո՞ւմ է, գրոսմայստերը պատասխանեց. «Շատ տաղանդավոր երեխաներ են: Մեր պատանիներից այնպիսիներն էլ կային, որոնք հաջող հանդես չեկան, բայց նրանք էլ շատ ուժեղ են իրենց տարիքային խմբերում»:
Կարդացեք նաև
Մեր երկրորդ հարցին, թե Արիաննեն այսօր 22 խաղատախտակների առեւ նստածներից կարո՞ղ է պարտություն կրել, Արոնյանը ծիծաղով հակադարձեց. «Կարող է այդպես էլ լինել: Շախմատի որակը Հայաստանում բարձրանում է»:
Աշոտ ՀԱԿՈԲՅԱՆ
