«Բարձր մաքսատուրքերով իրենց պաշտպանող շուկաները երկար կյանք չունեն: Պատմության մեջ չի եղել բարձր մաքսատուրքերով համակարգ, որն ունենար զարգացած տնտեսություն: ԵՏՄ-ն երկար կյանք ունենալ չի կարող՝ բացառապես տնտեսական պատճառներով: Տնտեսությունը զարգանալու համար պետք է լինի առավելագույնս բաց, մրցակցային՚,-Երեւանի մամուլի ակումբի այսօր՝ «Կոնգրես» հյուրանոցում կազմակերպած «Ռուս-հայկական հարաբերություններում առկա անվստահության դրսեւորումները եւ դրանց ազդեցությունը ինտեգրացիոն նախագծերի վրա» թեմայով քննարկման ժամանակ ասաց ՙՀայկական ժամանակ՚ օրաթերթի տնտեսական լրագրող Հայկ Գեւորգյանը:
Ըստ նրա, Հայաստանն ունի մրցակցային հսկայական առավելություններ, որոնք, սակայն, միայն տեսական են. «Ունենք հրաշալի պայմաններ, մարդկային-գիտական ռեսուրս, կրթական մակարդակ: Խնդիրն այն է, որ զարգացման ճիշտ ուղղություն պետք է վերցնել: ԵՏՄ-ում չենք կարող մեզ վստահ զգալ: Որպես օրինակ՝ Բելառուսը սկսեց ՌԴ-ի հետ բանակցել՝ գազի գինը նվազեցնելու շուրջ, եւ հանկարծ «Ռոսսելխոզնադզորը» բելառուսական կաթնամթերքի մեջ հայտնաբերեց վնասակար նյութեր: Բելառուսը հրաժարվեց իր պահանջից: Հետեւաբար, նման իրավիճակում նորմալ ինտեգրացիա չի կարող լինել»:
Բանախոսի համոզմամբ՝ եթե ԵՏՄ անդամ Հայաստանը սկսի ինքնուրույն քաղաքական քայլեր կատարել, «կպարզվի», որ ՌԴ արտահանվող հայկական լոլիկն ամենաանորակն է եւ դրա ճանապարհը կփակվի. «Նման օրինակները շատ են: Հայ տնտեսվարողը ռուսական շուկայի հասանելիության հույս չի կարող ունենալ»:
Կարդացեք նաև
Լուիզա ՍՈՒՔԻԱՍՅԱՆ
