Եկատերինա թագուհու պալատի ոսկերիչ, Ռուսական բանակի գեներալ, արեւելյան հարցերով Պոտյոմկինի խորհրդական: Խոսքը Լազարյանների տոհմի ամենանշանավոր անձանցից մեկի՝ Հովհաննես Լազարյանի մասին է:
Այսօր «Մոսկվա» կինոթատրոնում լեգենդար Լազարյանների մասին վավերագրական ֆիլմի պրեմիերան էր, որի ընթացքում էլ հանդիսատեսը ծանոթացավ այս ընտանիքի անդամների գործունեությանը եւ Ռուսաստանում թողած մշակութային ու հասակական հարուստ ժառանգությանը:
Միջոցառմանը ներկա էին Երեւանի փոխքաղաքապետ Արամ Սուքիասյանը, սպորտի եւ երիտասարդության հարցերով նորանշանակ նախարար Հրաչյա Ռոստոմյանը:
Արամ Սուքիասյանը մատնանշելով կիսադատարկ դահլիճն ասաց. «Հաշվի առնելով, որ ցուցադրվելիքը էրոտիկա չէ, հաշվի առնելով, որ այն սկանդալային նյութ չէ, օրինաչափ է, որ հանդիսատեսն այսքան քիչ է»:
Կարդացեք նաև
Փոխքաղաքապետի խոսքերով, Լազարյանների տոհմը հսկայական ծառայություններ է մատուցել ցարական Ռուսաստանին՝ չխորշելով իր ազգանունից. «Մենք գրեթե բոլոր պետություններում, երկրներում ունեցել ենք մեր հետքը դա գալիս է պատմական իրողությունից»: Պարոն Սուքիասյանը ֆիլմն արդեն դիտել էր: Նրա խոսքերով, ֆիլմը Լազարյաններին բացահայտում է մեկ այլ տեսանկյունից եւ այնտեղ տեղ են գտել այնպիսի մեկնաբանություններ, որոնք չենք գտնի ակադեմիական գրականությունում:
«Լազարյանների վերելքն ու անկումը» վերնագրով ֆիլմը «Հայկական հետքը Մոսկվայում» նախագծի մաս է կազմում:
Ֆիլմի հեղինակ, ռեժիսոր Նաիրա Բաղդասարյանը, որի համար նյութ է ծառայել նաեւ Մատենադարանի արխիվներում Լազարյանների մասին պահվող փաստաթղթերը ասաց, որ «Լազարյաններն առանձնահատուկ տեղ են զբաղեցնում հայ նշանավոր գործիչների շարքում, քանի որ նրանք առանձնահատուկ են եղել իրենց ժամանակի մեջ»:
Ըստ հեղինակի, նրանց տոհմը մոտ 250 տարի եղել է պատմության թատերաբեմում եւ այդ ընթացքում Լազարյանների տոհմում չի եղել, որեւէ մի ներկայացուցիչ, որը զբաղեցրած չլինի բարձր պետական պաշտոն, խոշոր բարեգործություն արած չլինի. «Նրանց թողած ժառանգությունն է հայկական եկեղեցիները Մոսկվայում, Պետերբուրգում, Լազարյան ճեմարանը, որի շենքում այսօր գտնվում է Հայաստանի դեսպանատունը»:
Ֆիլմից տեղեկանում ենք, որ այս ընտանիքին պատկանող ագարակն այժմ նրանց մասին պատմող թանգարան է:
Լուսինե ԲՈՒԴԱՂՅԱՆ
