«Ռուսները կարողացան առաջին անգամ տարանջատել տնտեսությունը եւ քաղաքականությունը»,- երեկ կայացած Էրդողան-Պուտին հանդիպումն այսպես է բնորոշում «Նորավանք» գիտակրթական հիմնադրամի տնօրեն Գագիկ Հարությունյանը: «Ռուսաստանը եւ Թուրքիան հասկանում են, որ իրենց ձգտումները Սիրիայում տարբեր են: Թուրքիան շատ անձնական խնդիրներ է փորձում լուծել»,-«Փաստարկ» մամուլի ակումբում այսօր ասաց նա:
«Պատրանք է, թե Թուրքիան թուլացած եւ մասնատված է: Էրդողանը հզոր քաղաքական գործիչ է, անկախ նրանից` դա մեր դուրը գալի՞ս է, թե ոչ: Էրդողանի շուրջը համախմբում կա, նա կարողանում է իր շահերը տարածաշրջանում պահպանել: Տեսանք, որ Թուրքիան Սիրիայում ստեղծել է մի տարածք, որը վերահսկում է»,-նշեց փորձագետը:
Նրա բնորոշմամբ` Սիրիայի հարցում ՌԴ-ի եւ Թուրքիայի տարաձայնությունները պահպանվելու են: Սիրիական հակամարտության հանգուցալուծման գործընթացում Գագիկ Հարությունյանը դրական միտումներ չի տեսնում. «ԱՄՆ-Ռուսաստան հարաբերությունները սրված են: Եթե ԱՄՆ-ում նախագահ լինի Քլինթոնը, ցավոք, նույն քաղաքական գիծն է շարունակվելու: Իսկ եթե Թրամփը, գուցե հեղափոխական ձեւով ինչ-որ հարցեր լուծի: Ամեն դեպքում, Սիրիական հակամարտության մեջ բախվում են տասնյակ երկրների շահեր: Խաղաղության հասնելը դժվար է»:
Կարդացեք նաև
Լուիզա ՍՈՒՔԻԱՍՅԱՆ
