Այսօր ՄԱԱ-ում Վիկտոր Դալլաքյանը հայտարարեց, որ ՀՀ նախագահի աշխատակազմի ղեկավարի տեղակալի եւ ԱԺ-ում նախագահի մշտական ներկայացուցչի պաշտոնից հրաժարականի դիմում է ներկայացրել եւ կուսակցական ցուցակով կմասնակցի 2017-ի ընտրություններին: Առայժմ փակագծերը չբացեց, միայն ասաց, որ իր նոր կուսակցության անունը «Շրջադարձ» չի լինի, ինչպես շրջանառվում է մամուլում:
Նա ասել էր, որ եթե իրեն կամ իր ընտանիքի անդամներից որեւէ մեկին որեւէ բան պատահի՝ պատասխանատուն Սերժ Սարգսյանն է: Ճիշտ նման արտահայտություն ժամանակին արել էր Արթուր Բաղդասարյանը, որից հետո տեսանք, թե ինչ եղավ: Չի՞ պատրաստվում Վիկտոր Դալլաքյանը այդ նույն սցենարով շարժվել՝ հարցին նա պատասխանեց, որ հումորի մեծ զգացողություն պետք է ունենալ՝ իրեն այդպես համեմատելու:
Aravot.am-ը հարցրեց՝ որքան էլ հումորի զգացում եք ասում, այնուամենայնիվ, արդեն վերջին օրերին լուրեր են շրջանառվում, որ ձեզ Բաղրամյան 26-ն է ուղարկել, ինչպե՞ս կարող եք հերքել եւ համոզել հակառակը՝ նա պատասխանեց. «Իմ այսօրվա ելույթից հետո նման գնահատականները ես համարելու եմ հումորի մեծ զգացողության հետեւանք: Եթե կան մարդիկ, որոնք ինձ կփորձեն հումորի հարթություն տեղափոխել, ես նրանց արդեն պատասխանեցի»:
Կարդացեք նաև
Մենք նաեւ հետաքրքրվեցինք՝ երբ ասում եք, որ եթե ձեզ հետ որեւէ բան պատահի, պատասխանատուն Սերժ Սարգսյանն է, Ձեզ սպառնացե՞լ են, Ձեր կյանքին վտա՞նգ է սպառնում, թե՞ դա զուտ ինտրիգի համար ասացիք՝ նա պատասխանեց. «Ես երկրի ուժային բոլոր կառույցներին՝ ոստիկանություն, դատախազություն, երկրի առաջին դեմք, նրանց գործունեությանը գնահատականներ եմ տվել: Համաձայն եք, որ եղել է իմ գնահատականը կոշտ եւ ճշգրիտ: Գիտեք՝ ինչ երկրում ենք ապրում: Ես գիտեմ, որ կարող է նման բան տեղի ունենալ: Ես սա հենց այնպես, ինչ-որ բլեֆի համար չեմ ասում; Պատկերացրեք, ես այսօր ժամը 7-ին տուն եմ գնալու, կարող է, չէ,՞ մի բան լինի: Ես ի՞նչ երաշխիք ունեմ»:
Մեր հարցին՝ թիկնապահ չե՞ք ուզում պահել՝ նա պատասխանեց. «Բացարձակ, իմ թիկնապահը Աստված է»:
Հարցին, թե ինչպե՞ս Սերժ Սարգսյանը այդպես հեշտ բաց թողեց Ձեզ, երբ ասացիք հրաժարականի մասին, նա վստահեցրեց, որ մինչ այս ասուլիսը որեւէ մեկը իր հայտարարության մասին չի իմացել: Ասուլիսից առաջ՝ առավոտյան է իր դիմումները տարել նախագահի նստավայր. «Դա բոլորի համար եղել է անակնկալ»:
Սեյրան Օհանյանի հետ համագործակցության տեղեկությունները Վիկտոր Դալլաքյանը ոչ հերքեց, ոչ հաստատեց. «Սեյրան Օհանյանն իր գործունեության եւ ծրագրերի մասին որեւէ հրապարակային հայտարարություն չի կատարել, ուստի ես ձեռնպահ կմնամ որեւէ գնահատական տալ: Ես բարձր եմ գնահատում Սեյրան Օհանյանի գործունեությունը եւ կարծում եմ, որ ցանկացած կուսակցության համար պատվաբեր կլիներ, որպեսզի նման ռազմական պետական գործիչը անդամակցեր իրենց կուսակցությանը»:
Թե ո՞վ է ֆինանսավորելու նրա նոր կուսակցությունը, կա՞ ռուսական հետք՝ նա պատասխանեց. «Այսօր ՀՀ ինքնիշխանության լիարժեք իրականացում եմ ասել ռազմավարական խնդիրների մասին խոսելիս: Երբ ՀՀ իշխանությունները ընտրված չեն լինում, արտաքին մարտահրավերների առջեւ շատ խոցելի են լինում: Ես նորություն ասած չեմ լինի, եթե ասեմ, որ հայամետ քաղաքական գործիչ եմ»:
Հռիփսիմե ՋԵԲԵՋՅԱՆ
ԳՐԱԳԵՏ ՈՒ ԲԱՆԻՄԱՑ ՄԱՐԴ, ՈՒՄ ԿԱՐԻՔՆ ԻՐՈՔ ԿԱ ՄԵՐ ԱԺ-ՈՒՄ, ԻՍԿ ՍԵՐԺ ՍԱՐԳՍՅԱՆՆ ԱՅՍ ՏԻՊԻ ՄԱՐԴԿԱՆՑ ՓՈՐՁՈՒՄ Է ՎԱՐԿԱԲԵԿԵԼ, ՄԵԾ ՎՏԱՆԳԻՑ ԽՈՒՍՅՍ ՏԱԼՈՒ ՀԱՄԱՐ, ՊԱՐՈՆ ԴԱԼԼԱՔՅԱՆ ՇԱՏ ԵՆՔ ՀԱՐԳՈՒՄ ՁԵԶ, ՁԵՐ ՆՄԱՆ ՄԱՐԴԸ ԱՐԺԱՆ ՉԻ ԱՅՍ ԿԵՂՏՈՏ ԻՇԽԱՆՈՒԹՅԱՆԸ,
ՀԱՋՈՂՈՒՄ ԵՄ ՄԱՂԹՈՒՄ ՁԵՐ ԳՈՐԾԵՐԻ