Այսօր ՄԱԱ-ում նախագահի աշխատակազմի ղեկավարի տեղակալ եւ ԱԺ-ում նախագահի ներկայացուցիչ Վիկտոր Դալլաքյանը, ինչպես տեղեկացրել ենք, հայտարարեց իր՝ պաշտոններից հրաժարականի եւ 2017-ի ընտրություններին ակտիվ մասնակցելու մտադրության մասին:
Նա ներկայացրեց իր տեսլականը, ըստ որի՝ հայկական կապիտալը կդառնա հայկական իրականություն:
ԼՂՀ հակամարտության հարցում նա ասաց, որ լուծում է տեսնում հայ-ադրբեջանական հարաբերությունների ընդհանուր կարգավորման ֆոնի վրա. «Հաջորդ կարեւոր խնդիրը հայության գոյաբանական ճգնաժամի եւ Հայաստանի կատաստրոֆիկ դեմոգրաֆիական վիճակի բարելավումն է: Այդ ճգնաժամը սկսվել է Բագրատունիների թագավորության անկումից հետո: ՀՀ-ն աստիճանաբար կորցրել է իր պատմական տարածքները: Հաջորդ կարեւոր խնդիրը ՀՀ-ի ինքնիշխանության լիակատար ամրագրումն է եւ ՀՀ-ին պարտադրված աշխարհաքաղաքական կողմնորոշումների պարտադրումն է: Մյուս խնդիրը ՀՀ-ի ապաշրջափակումն է՝ աբխազական երկաթուղու, Գյումրի-Կարս երկաթուղիների վերագործարկում եւ Իրան-Հայաստան երկաթուղու կառուցում»:
Նա պատմեց, թե քանի օրենսդրական նախաձեռնության հեղինակ է եղել՝ 83, որ «Առավոտ» թերթը իրեն համարել է նորանկախ Հայաստանի օրենսդիրը:
Կարդացեք նաև
Նա իր նախկին ելույթից մի հատված կրկնեց, որ իր պատգամավորական գործունեության ընթացքում համագործակցել է ՀՀ երեք նախագահների հետ եւ միաժամանակ քննադատել է նրանց: Նա ասաց, որ համագործակցել է նաեւ վարչապետների հետ. «Երբեք նրանց որեւէ անձնական հարցով չեմ դիմել»:
Նա պատմեց, թե ինչպես է Սերժ Սարգսյանը իրեն խնդրել, որ համագործակցեն եւ ինչպես է ինքը անդամակցել ՀՀԿ-ին:
Սակայն 2012-ի խորհրդարանական ընտրությունների ժամանակ, նրա խոսքերով՝ իշխանությունները համագործակցել են «լուսավոր հանցագործի» հետ. «2012-ի ընտրություններից հետո Սերժ Սարգսյանը ինձ հրավիրել է Ստեփանակերտ: Մենք հանդիպել ենք մայիսի 8-ին, հանդիպմանը եղել է կաթողիկոսը, Բակո Սահակյանը, Սերժ Սարգսյանը եւ ես: Սերժ Սարգսյանը ինձ հարց տվեց՝ ինչու այդպես ստացվեց, խոսքը Վանաձորի մասին էր: Ես ասացի, որ ես այդպես ստացվելու պատասխանը եկել եմ ձեզանից ստանամ: Ես 4 անգամ անընդմեջ ընտրվել եմ պատգամավոր, որին դեմ են եղել ՀՀ առաջին եւ երկրորդ նախագահները: Ես Սարգսյանին հարցրել եմ, դուք հրապարակայնորեն իբր ինձ պաշտպանել եք, բայց արդյունքում ես չեմ ընտրվել»:
Նա պատմեց, որ Սերժ Սարգսյանին բողոքել է, որ իր մրցակիցը 5 տարի անընդմեջ ՀՀ-ում չի բնակվել, օրենքի խախտումով է առաջադրվել. «Սերժ Սարգսյանը պատասխանեց՝ բողոքարկի՛ր: Ես բողոքարկել եմ եւ Վանաձորի ընտրատարածքային ընտրական հանձնաժողովը ինձ մերժել է: Դուք տեսե՞լ եք իշխանության մի ներկայացուցիչ, որը նշել է, որ մրցակիցը Հայաստանում չի բնակվել եւ նրան մերժել են, տեսե՞լ եք:
Դրանից հետո Սերժ Սարգսյանի հետ Վիկտոր Դալլաքյանը նորից է հանդիպել: Նախագահը, նրա պատմելով, ասել է, որ ինքը հանդիպում է ունեցել Էդմոն Մարուքյանի հետ, այսինքն, իրեն հասկացրել է, որ հարցը փակված է:
Վիկտոր Դալլաքյանը հայտարարեց. «Ստել են Տիգրան Մուկուչյանը, Վլադիմիր Գասպարյանը, Վանաձորի թիվ 2 Ընտրատարածքային ընտրական հանձնաժողովի նախագահը, որ այդ անձնավորությունը 5 տարի անընդմեջ բնակվել է ՀՀ-ում»:
Նա ներկայացրեց մի հարցման պատասխան, որը փաստաբան Վահե Հովսեփյանն է արել ՌԴ սահմանապահ ծառայության ղեկավարին՝ Էդմոն Մարուքյանի այցելությունների վերաբերյալ: Ըստ հրապարակված պատասխանի, «Էդմոն Մարուքյանը 2009-ի հունիսի 13-ին ՀՀ-ից Զվարթնոց օդանավակայանից մեկնել է ԱՄՆ եւ ՀՀ է վերադարձել 30/06/2010-ին: Նա ՀՀ-ից բացակայել է 1 տարի 17 օր, մինչդեռ տեղեկանք են ՀՀ-ում տվել, թե նա 5 տարի անընդմեջ բնակվել է ՀՀ-ում»:
Նա ասաց, որ մենք ունենք լուսավոր հանցագործ, որը ունի պապաներ ՀՀ բարձրադիր իշխանությունում:
Նոր գլխավոր դատախազը, Վիկտոր Դալլաքյանի խոսքերով՝ «Պետք է այս փաստի հետ կապված գործ հարուցի եւ համապատասխան պաշտոնյաների «ականջից բռնի, դուրս գցի»:
Հռիփսիմե ՋԵԲԵՋՅԱՆ
Էս մարդը դեռ վառվումա, որ Վանաձորի ժողովուրդը իրա նմանների դիմակը պատռեց…Հազիվ անդուր ձայնդ չէնք լսում այսքան տարի…Հիմա որ կոստյումդ ես ուղարկելու, որ քեզ ընտրեն…