Այսօր Կենտրոն եւ Նորք-Մարաշ համայնքների ընդհանուր իրավասության դատարանում դատավոր Արշակ Վարդանյանի նախագահությամբ «Էլեկտրիկ Երեւանի» դեպքերի ժամանակ լրագրողների մասնագիտական գործունեությունը խոչընդոտելու վերաբերյալ գործի քննությունն էր:
Հիշեցնենք, որ լրագրողի մասնագիտական օրինական գործունեությանը խոչընդոտելու, ուրիշի գույքը դիտավորությամբ ոչնչացնելու կամ վնասելու վերաբերյալ ՀՀ հատուկ քննչական ծառայությունում իրականացված նախաքննության ընթացքում մեղադրանք էր առաջադրվել ոստիկանության 4 աշխատակիցների:
Ոստիկաններ Տաճատ Նորատունկյանը, Արթուր Այվազյանը, Կոստան Բուդաղյանը եւ Դավիթ Փերիխանյանը ընդունել են իրենց մեղքը:
Կարդացեք նաև
Այսօր դատարանում տուժող լրագրողներից չէր ներկայացել միայն «Արմենիա» հեռուստաընկերության լրագրող Խաչատուր Եսայանը:
Դատավորը ճշտեց ամբաստանյալների ինքնությունը: Ավագ սերժանտ Տաճատ Նորատունկյանն ասաց, որ խնամքին ունի 4 տարեկան երեխա: Երբ դատավորը հարցրեց, թե որտե՞ղ է ծառայել՝ նկատի ունենալով ոստիկանության ո՞ր բաժնում եւ հիմա համակարգո՞ւմ է, թե՞ ոչ՝ ոստիկանը սկսեց պատմել բանակի իր ծառայությունից. «Ծառայել եմ Արմավիրում»:
Ոստիկանության ՊՊԾ գնդի երրորդ հատուկ գումարտակում ծառայող, սերժանտի կոչում ունեցող Արթուր Այվազյանն ասաց, որ միջնակարգ կրթություն ունի, ամուսնացած է, խնամքին ունի երկու անչափահաս երեխա, մեծը՝ 5 տարեկան: Մյուս ամբաստանյալը՝ ոստիկանության կապիտան Կոստան Բուդաղյանն ասաց, որ իր խնամքին ունի թոշակառու ծնողներ:
Ուշագրավ էր ոստիկան Դավիթ Փերիխանյանի պատասխանները դատարանում: Նա ասաց, որ բարձրագույն զինվորական կրթություն ունի եւ խնամքին ունի 5 ամսական տղա: Դատավորի բոլոր հարցերին նա պատասխանում էր զինվորական խրոխտությամբ կամ «ճիշտ այդպե՛ս», կամ «ոչ մի կե՛րպ»:
Տուժողների ներկայացուցիչն է Դավիթ Գյուրջյանը, իսկ ամբաստանյալների շահերն է ներկայացնում Տիգրան Գալստյանը:
Դատական նիստի ընթացքում «Ֆոտոլուրի» լրագրող Հայկ Բադալյանն ասաց, որ շտապում է, ուզում է դուրս գալ՝ հատկապես, որ որեւէ բողոք չունի ոստիկանի դեմ:
Հիշեցնենք, որ նրան, ըստ ՀՔԾ-ի, ոստիկանները 2015-ի հունիսի 23-ին Ազատության հրապարակից ապօրինաբար բերման էին ենթարկել եւ խոչընդոտել մասնագիտական օրինական աշխատանքը:
Հայկ Բադալյանը դատարանից դուրս եկավ ամբաստանյալ ոստիկան Արթուր Այվազյանի հետ գրկախառնված՝ թեւերն ուսերին գցած: Ավելին, ոստիկանն ասաց, որ իրենք ընկերներ են եւ ոչ մի խնդիր չունեն իրար դեմ:
Հռիփսիմե ՋԵԲԵՋՅԱՆ
