Հոկտեմբերի 8-ին Ժիրայր Ոսկանյանի արծաթյա զարդերի առաջին՝ «Գառնի» անունը կրող հեթանոսական հավաքածուն ներկայացվեց «Արմմոդ ֆեշն» նորաձեւության ցուցադրության շրջանակներում, որը տեղի ունեցավ «Արմենիա Վայն» գինու գործարանի մառանում: Հավաքածուն ստեղծելիս Voskanyan’s բրենդի հիմնադիրն օգտագործել է Գառնու հեթանոսական տաճարի զարդաքանդակները, դետալները, եւ Հայկական լեռնաշխարհի ժայռապատկերները:
Դիզայներն ասում է, որ առաջին հավաքածուն նվիրել է Գառնու տաճարին ՝ ընդգծելով, որ լուսանկարչությունն է իրեն «դրդել» ներկայացնել տարբեր ժամանակաշրջանների հայկական ճարտարապետությունը, զարդաքանդակները, սիմվոլները արծաթյա զարդերի տեսքով:
«Սիրում եմ լուսանկարել հայկական ճարտարապետական կոթողները՝ դետալ առ դետալ, եւ հենց այդ լուսանկարները նայելիս ինձ մոտ ծնվեց այդ զարդաքանդակները արծաթի վրա վերարտադրելու գաղափարը»,-ընդգծում է Ժիրայրը՝ հավելելով, որ կարեւորում է որմնաքանդակների պատմությունը զարդերին կից ներկայացնելը: Նա շնորհակալություն հայտնեց «Հայկականը նորաձեւ է» կարգախոսով առաջնորդվող «Արմմոդ ֆեշն» նախագծի կազմակերպիչներին, հատկապես` Ռուբինա Գրիգորյանին՝ սկսնակ դիզայներիներին անշահախնդիր սատարելու համար:
Ցուցադրությանը, ի թիվս այլ ստեղծագործողների մասնակցում էր նաեւ երգչուհի Աստղիկ Սաֆարյանը՝ գլխարկների ու աքսեսուարների իր հավաքածուով:
Երգչուհի Սոնա Շահգելդյանը նույնպես պետք է մասնակցեր ցուցադրությանը, սակայն նրա դիզայնով արված պայուսակների հավաքածուն ինչ-ինչ պատճառներով այդպես էլ պոդիում չբարձրացավ:
Անահիտ ՍԱՀԱԿՅԱՆ
