Խորոված պղպեղի սիրահարները պատրաստ են պղպեղը հենց այդպես ուտել կամ պանրի հետ լավաշի մեջ բրդուճ անել, բայց երբեմն էլ որոշ փոփոխություն են ցանկանում: Այս նախուտեստը չափազանց պարզ է, սակայն գեղեցիկ է նայվում, միանգամից գրավում է գույների համադրությամբ:
Անհրաժեշտ մթերքները
Գունավոր պղպեղներ (կարմիր, դեղին, նարնջագույն, կանաչ)-1 կգ
Ձիթապտուղ-10-15 հատիկ
Ձիթապտղի յուղ-3-4 գդալ
Բալզամիկ քացախ- 1-2 գդալ
Աղ-ըստ ճաշակի
Սեւ պղպեղ-ըստ ճաշակի
Թարմ կամ չորացրած համեմ կամ սամիթ- մի քանի ճյուղ (չորացրածը՝ մի թեյի գդալի չափով)
Պատրաստման եղանակը
Կարդացեք նաև
Պղպեղները լվացեք, չորացրեք, ջեռոցում, գազօջախի կամ կրակի վրա խորովեք (կրակի վրա խորովելու դեպքում կարող եք պղպեղները նախապես չլվանալ): Խորովելուց հետո, որպեսզի կեղեւը հեշտ եւ արագ դուրս գա, պղպեղները լցրեք պոլիէթիլենե տոպրակի մեջ, բերանը փակեք: Չորս-հինգ րոպեից կարող եք կեղեւել:
Կեղեւած պղպեղները գեղեցիկ դասավորեք մատուցարանի մեջ: Վրան լցրեք կորիզահան ձիթապտուղները, աղն ու պղպեղը, ձիթապտղի յուղն ու բալզամիկ քացախը: Զարդարեք մանրած կանաչիով:
Բարի ախորժակ:
Պատրաստեց
ՄԵԼԱՆՅԱ ԲԱՐՍԵՂՅԱՆԸ
«Առավոտ»
08.10.2016
