ՀՀ ԱԺ նախագահ Գալուստ Սահակյանը շնորհավորական ուղերձ է հղել Թարգմանչաց տոնի առթիվ, որում ասվում է.
«Դեռ հարյուրամյակներ առաջ ենք մենք թարգմանչական արվեստի գլուխգործոցներ ստեղծել եւ դրանցով միացրել լեզուներ, ժողովուրդներ ու աշխարհներ: Թարգմանչությունը մեզանում սկզբնավորվել է որպես մշակույթ` շնորհիվ այն բարձրակարգ թարգմանությունների, որոնք այսօր էլ կազմում են ոչ միայն հայ, այլեւ համաշխարհային գրականության գանձարանի անբաժանելի մասը: Որքան էլ ներկայում թարգմանչական գործը մասնագիտություն լինելուց զատ վերածվել է մի ամբողջ տնտեսության` խոսքից ու լեզվից բացի ներառելով նաեւ բազմաթիվ ժամանակակից տեխնոլոգիաներ, այդուհանդերձ, մեզանում ստեղծված թարգմանչական արժեքները շարունակում են հիմնաստեղծ ու ավանդույթ ձեւավորող դեր ունենալ:
Թարգմանչի աշխատանքը հսկայական պատասխանատվություն է ստեղծագործության, նրա հեղինակի, ընթերցողի եւ հենց իր առջեւ: Այդ ամենը խորապես գիտակցել են թե՛ Մեսրոպ Մաշտոցն ու Սահակ Պարթեւը, թե՛ նրանց աշակերտները: Այսօր, նշելով Թարգմանչաց տոնը, մենք հարգանքի տուրք ենք մատուցում թե՛ նրանց կատարած աշխատանքին ու ժառանգությանը, թե՛ այն պատասխանատվությանը, որով առաջնորդվել են նրանք եւ որը կարեւորագույն նշանակություն ունի նաեւ այսօրվա թարգմանչական գործում:
Համոզված եմ, որ գրի, գրականության ու խոսքի հանդեպ մեր ժողովրդի առանձնահատուկ վերաբերմունքը շարունակելու է մեր հոգեւոր հարստացման խթան հանդիսանալ` նպաստելով նաեւ թարգմանչական գործի զարգացման միջոցով մեր մշակույթն այլոց հասանելի դարձնելուն»:
Կարդացեք նաև
ԱԶԳԱՅԻՆ ԺՈՂՈՎԻ ՀԱՍԱՐԱԿԱՅՆՈՒԹՅԱՆ ԵՎ ՏԵՂԵԿԱՏՎՈՒԹՅԱՆ ՄԻՋՈՑՆԵՐԻ ՀԵՏ ԿԱՊԵՐԻ ՎԱՐՉՈՒԹՅՈՒՆ
