Այս շաբաթ տեղի ունեցած ՀՀ ԱԺ քառօրյայի ընթացքում խնդրահարույցներից էր նաև կառավարության կողմից ներկայացված` Հասարակական կազմակերպությունների մասին օրենքի նախագծերի փաթեթի քննարկումը:
Մասնավորապես փոփոխությունների համաձայն` տարանջատում է մտցվելու՝ ՀԿ-ն հանրայի՞ն միջոցներից է սնվում, թե՞ մասնավոր ֆինանսավորում ունի:
Ի վերջո` ՀՀ ԱԺ-ն ընդունեց այս փոփոխությունները:
Հասարակական կազմակերպությունների դիրքորոշումն այս հարցում ոչ միանշանակ է, սակայն ԱԺ-ում ընդունված փոփոխությունները հիմնականում հ/կ-ների սրտով են:
Կարդացեք նաև
ՀՔԱ Վանաձորի գրասենյակի ղեկավար Արթուր Սաքունցն, ընդհանուր առմամբ գոհ է օրենսդրական այս փոփոխություններից: Aravot.am-ի հետ զրույցում այս առիթով ասաց. «Օրենքում փոփոխություններ կատարելու նախագծի ընդունումը կարևոր էր, քանի որ փարատվեցին բոլոր այն մտահոգությունները, թե հնարավոր է` նախագիծն այնպես ձևափոխվի, որ մեծանա հ/կ-ների նկատմամբ իշխանության հսկողության աստիճանը»:
Պարոն Սաքունցը գոհ է, որ զերծ մնացինք հնարավոր այն վատթարագույն սցենարից, որը տեսանք ՌԴ-ում կամ մյուս հետխորհրդային երկրներում`Ադրբեջանում, Ղրղզստանում խորհրդարանի մեծամասնությունը ևս հավանություն չտվեց այդ փոփոխություններին:
Նշենք, որ այս փոփոխությունների փաթեթում սկզբունքային էր հ/կ-ների աուդիտի հարցը: Այս առիթով պարոն Սաքունցն ասաց. «Ամրագրվեց, որ աուդիտի կարող են ենթարկվել միայն պետական բյուջեից ֆինանսավորում ստացող հ/կ-ները»:
Բայց դեռ ակնկալիքներ էլ կան. «Օրենքի մեջ պետք է անհրաժեշտ հստակեցում լինի հ/կ-ների կողմից հանրային շահի պաշտպանության ուղղությամբ հանդես գալու ճանաչման մասով, բայց դա հետագա աշխատանքի ընթացքում կլինի»:
Արթուր Սաքունցը փաստեց, թե կարևոր է, որ ՀՀ արդարադատության նախարարությունը ներկայացրեց ՀԿ-ների հետ տարիներ շարունակ քննարկած տարբերակը:
Տաթև ՀԱՐՈՒԹՅՈՒՆՅԱՆ
