Երեւանի «Դինամո» մարզադահլիճում նորաստեղծ «Ուրարտու» տղամարդկանց բասկետբոլային ակումբը Ռուսաստանի Սուպերլիգա-1 2016/2017 թթ. առաջնության մեկնարկային խաղում լրացուցիչ ժամանակում (հիմնական ժամանակն ավարտվեց 82:82) 89:93 հաշվով զիջեց Ռյազանի համանուն թիմին:
Մեր բասկետբոլիստները ամբողջ խաղի ընթացքում հավասար պայքար մղեցին բազմափորձ հյուրերի հետ, անգամ եղավ մի պահ, երբ «Ուրարտուն» 10 միավորի առավելություն ուներ, սակայն դա պահպանել չկարողացավ:
Մեր բասկետբոլիստները միանգամայն ի վիճակի էին այս խաղում հաղթել, եթե մինչեւ հանդիպման սկսվելը անցանկալի անակնկալներ չլինեին: Մեկնարկից րոպեներ առաջ պարզվեց, որ մեր թիմի երեք առանցքային խաղացողներ՝ Վիկտոր Հովսեփյանը, Արիզոնա Ռեյդը եւ Վիկտոր Ուսկովը իրավունք չունեն մասնակցել խաղին ու այդ հանգամանքը գլխավոր մարզիչ Տիգրան Գյոկչյանի մեկնաբանությամբ բացասաբար ազդեց թե մյուս տղաների, թե հանդիպման ընթացքի վրա:
Aravot.am-ի հարցին, թե հոկտեմբերի 9-ին կայանալիք «Սամարայի» հետ հանդիպմանը խնդիրները կարգավորվա՞ծ կլինեն, մարզիչը պատասխանեց, որ այդպիսի ակնկալիքներ ունի:
Աշոտ ՀԱԿՈԲՅԱՆ
