Հայաստանում Ֆրանսիայի դեսպան Ժան-Ֆրանսուա Շարպանտիեն եւ Հայաստանում Ֆրանսիական համալսարանի (ՀՖՀ) ռեկտոր Ժան-Մարկ Լավեստը հոկտեմբերի 6-ին Ֆրանսիայի դեսպանատանն ընդունեցին ՀՖՀ ավելի քան 200 շրջանավարտի: Հայաստանում Ֆրանսիական համալսարանի ստեղծումից ի վեր սա բուհի շրջանավարտների նման մասշտաբի առաջին հավաքույթն է:
Հայաստանում Ֆրանսիայի դեսպանն իր ողջույնի խոսքում նշեց, որ ուրախ է ընդունել Ֆրանսիական համալսարանի շրջանավարտներին: «Իր գոյության 15 տարիների ընթացքում համալսարանը տվել է 1456 շրջանավարտ: Դուք բոլոր շրջանավարտներդ ունեք ընդհանուր վճռականությունը, որով Ֆրանսիական դիպլոմ ստացաք, տիրապետում եք լեզվին, նպաստում ֆրանսիական մտածելակերպի տարածմանը Հայաստանում»,- նշեց պարոն Շարպանտիեն:
Դեսպանն անդրադարձավ նաեւ 2014թ. Ֆրանսիայի արտգործնախարարության կողմից ստեղծված շուրջ 36000 անդամ ունեցող «Ֆրանս Ալյումնի» ցանցին, որն իր շուրջն է համախմբում Ֆրանսիայում եւ արտերկրում գործող Ֆրանսիական կրթօջախների, ՀՖՆ նախկին ուսանողների եւ ստաժորների:
Կարդացեք նաև
Ժան-Մարկ Լավեստը շնորհակալություն հայտնեց դեսպանին, որը չնայած աշխատանքային ծանրաբեռնվածությանն առաջարկել էր, որ միջոցառումը դեսպանատանը կայանա:
Ռեկտորը փաստեց, որ շնորհիվ բուհի տված գիտելիքների եւ դիպլոմի` Ֆրանսիական համալսարանի ուսանողները բարձր պաշտոններ են զբաղեցնում տարբեր ոլորտներում: «ՀՀ նոր կառավարությունը երեկ վերջնականապես ձեւավորվեց, եւ մեր նախկին շրջանավարտը ներգրավված է նորաստեղծ կառավարության մեջ»,- ասաց ռեկտորը: Ավելի ուշ նա նշեց, որ նկատի ունի վարչապետի խորհրդականին:
«Մտավախություն կար, որ Հայաստանում Ֆրանսիական համալսարանի տված կրթությունը կարող է բերել ուղեղների արտահոսքի, սակայն 80 եւ ավելի տոկոսն աշխատում է ի նպաստ եւ ի բարօրություն Հայաստանի Հանրապետության»,-ասաց Ժան-Մարկ Լավեստը: Նրա ձեւակերպմամբ, Ֆրանսիան մեծ հանձնառություն է ցուցաբերել թե քաղաքական, թե ֆինանսական առումով, որովհետեւ այսօր տարեկան 600 եվրո յուրաքանչյուր ֆրանսիացի հարկատուից ուղղվում է Հայաստանի Ֆրանսիական համալսարանի ուսանողների եւ համալսարանի ծախսերը հոգալուն:
Գոհար ՀԱԿՈԲՅԱՆ
