Արժույթի միջազգային հիմնադրամի (ԱՄՀ) կանխատեսումների համաձայն` առաջիկա մեկուկես տարիներին Հայաստանում տնտեսական աճի տեմպերը չեն գերազանցի 3.5 տոկոսը:
Հիմնադրամի կողմից օրերս հրապարակված հերթական զեկույցում նշված է, որ 2016 թվականը Հայաստանը փակելու է իրական համախառն ներքին արդյունքի (ՀՆԱ) 3.2 տոկոս աճով: 2017-ին Արժույթի միջազգային հիմնադրամի մասնագետները կանխատեսում են արդեն 3.4 տոկոսի աճ: Ավելի երկարաժամկետ կտրվածքով` մինչև 2021 թվականը, Հայաստանում ՀՆԱ-ի աճի ցուցանիշը, ըստ հիմնադրամի մասնագետների, կազմելու է 4 տոկոս: Այս ցուցանիշով Հայաստանն առաջիկա տարիներին կշարունակի գերազանցել Ադրբեջանին, բայց կզիջի մյուս հարևանին` Վրաստանին:
Արժույթի միջազգային հիմնադրամի մասնագետների պնդմամբ՝ 2016 թվականի արդյունքները Ադրբեջանի տնտեսության համար բավական տխուր են լինելու: Ընթացիկ ողջ տարվա կտրվածքով Ադրբեջանում իրական ՀՆԱ-ի 2․5 տոկոս անկում կարձանագրվի: Հաջորդ տարի տնտեսական աճը կվերադառնա Ադրբեջան` ընդամենը 1.4 տոկոս կազմելով: «Հնգամյա կտրվածքով ևս Ադրբեջանը կզիջի Հայաստանին», – պնդում են ԱՄՀ փորձագետները: Նրանց կանխատեսմամբ, 2021-ին ադրբեջանական տնտեսության աճը 3.2 տոկոս կկազմի` նույն ժամանակահատվածում Հայաստանում սպասվող 4 տոկոս աճի դիմաց:
Վրաստանում ակնկալվող ցուցանիշները ևս շատ բարձր չեն լինի, սակայն հարևանների ֆոնին սպասվող արդյունքները ավելի բարվոք են: Հիմնադրամի մասնագետները ակնկալում են, որ 2017 թվականին Վրաստանում ՀՆԱ-ի իրական աճի տեմպերը կգերազանցեն 5 տոկոսը: Առաջիկա հինգ տարիների կտրվածքով աճի ցուցանիշը Վրաստանում, ըստ հիմնադրամի, 4.8 տոկոս է կազմելու:
Կարդացեք նաև
Նյութի մանրամասները կարդացեք «Ազատություն» ռադիոկայանի կայքում
