ՀՀ մշակույթի նախարար Արմեն Ամիրյանը հանձնարարել է մշակույթի նախարարությանն առնչվող խնդիրների մասին մամուլում տեղ գտած հրապարակումներն ուսումնասիրել, իսկ Armtimes.com-ի՝ «Պրիմիտիվ գողություն՝ թաղման կառավարական հանձնաժողովներում, գողանում են որքան կարող են» հոդվածի վերաբերյալ կոնկրետ հանձնարարական է տվել։ «Ես տվել եմ հանձնարարական եւ խոստանում եմ, որ պիտի բարձրաձայնենք այս հարցը»,- ասաց նա ու նշեց, որ դեռ միանշանակ չի կարող ասել, գողություն եղել է, թե՝ ոչ։
«Ծանոթ եմ հրապարակմանը, ճիշտն ասած, դա գրվել է մինչ իմ նշանակվելը, բայց հիմա իմ մամուլի ծառայությունը, որ բավականին լավ է աշխատում, նաեւ մինչեւ իմ նշանակումը գրված բոլոր հրապարակումները փորձում է ուսումնասիրել եւ դարձնել հանձնարարականներ։ Իսկ այս օրերին այդ հրապարակումը դարձել է հանձնարարական եւ ուսումնասիրության առարկա։ Ուսումնասիրելուց հետո նոր կկարողանամ կարծիք հայտնել»,- ասաց Արմեն Ամիրյանը։
Անդրադառնալով իր նշանակման մասին թեւավոր դարձած արտահայտություններին, համացանցում ծավալված քննարկումներին, նա ասաց. «Հանրության մեջ քննադատությունը, նաեւ դաստիարակության իմաստով, ցինիզմի է հասնում, եւ հենց սրան է կոչված մշակույթի նախարարությունը, որպեսզի կարողանա մեր հասարակությանն այնպես կրթել, որ ցինիզմը դուրս գա մեր հասարակության միջից, որովհետեւ, իմ խորին համոզմամբ՝ ընտանիքը պետության հիմքերի հիմքն է»:
Կարդացեք նաև
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
