Այսօր հանրապետության նախագահ Սերժ Սարգսյանը անակնկալ եկել էր կառավարություն՝ մասնակցելու կառավարության նիստին: Նախագահն ասաց, որ այս կառավարությունը տարբերվելու է նախորդ կառավարություններից, հորդորելով վարչապետ Կարեն Կարապետյանին լինել հաստատակամ եւ ամուր:
Ապա` դիմելով կառավարության անդամներին, նկատեց՝ «ինչպես պայմանավորվել ենք՝ նեղանալ չկա»:
Նախագահը շարունակելով խոսքն, ասաց՝ «Վարչապետը սոսկ ձեր ղեկավարը չէ, վարչապետն այս թիմի առաջնորդն է: Ես վստահ եմ, որ նրա կշտամբանքներն ու դիտողությունները ձեր անձին չեն ուղղված»: Նախագահը հորդորեց չվիրավորվել, քանի որ աշխատանքային մթնոլորտ է:
Ի պատասխան՝ Կարեն Կարապետյանն իր թիմի անունից շնորհակալություն հայտնեց եւ ասաց, որ նախագահի խոսքերը պարտավորեցնող են: Կարեն Կարապետյանը նաեւ վստահեցրեց, որ իրենց աշխատանքով քաղաքացուն ամենօրյա ազդակներ են տալու եւ նրանց սպասումները արդարանալու են: «Շուտով կներկայացնենք մեր ծրագիրը»,- ասաց վարչապետը, վստահեցնելով, որ ամեն կարեւոր հարց քննարկելու են հասարակության հետ, լսելու են նրանց կարծիքը, դժգոհությունները, դիտողությունները եւ պարբերաբար բացատրելու են, թե ինչ նպատակով են այս կամ այն գործն անում:
Կարդացեք նաև
Նախագահը իր ելույթի վերջում ասաց, որ այդ ամենը բերելու է նրան, որ մարտահրավերները կամաց-կամաց տեղի են տալու: Ապա Սերժ Սարգսյանը դիմելով կառավարությանը, հարցրեց՝ կա՞ն հարցեր: Դահլիճի լռությունից հետո արձագանքեց. «Երբ հարցեր չեն առաջանում՝ կամ հասկանալի եւ ընդունելի են հարցերը, կամ՝ անհասկանալի ու անընդունելի»:
Նախագահի խոսքի մանրամասներն՝ առաջիկայում:
Ի դեպ, կառավարության մամուլի սրահի մոնիտորները չէին հեռարձակում պատկերը եւ լրագրողները այդպես էլ չկարողացան նախագահին տեսնել կառավարության նիստում:
Վարչապետը մի քանի րոպեով ընդհատեց նիստը՝ նախագահին ճանապարհելու համար: Երբ նախագահը դուրս էր գալիս, լրագրողները նրանից հետաքրքրվեցին՝ այլեւս կոռուպցիա չի՞ լինելու, կամ՝ ինչպե՞ս եք պայքարելու կոռուպցիայի, մենաշնորհների դեմ: Սերժ Սարգսյանը հարցերին չպատասխանեց, միայն ասաց՝ «Չէի՞ք լսում նիստի ժամանակ ինչ էի ասում»:
Նախագահի այցով պայմանավորված՝ կառավարության առաջ ամեն հինգշաբթի ցույց անող մի խումբ քաղաքացիների արգելել էին կառավարության շենքի մոտ բողոքի ակցիա իրականացնել եւ ոստիկանները պատ կազմած թույլ էին տալիս «հեռվից բողոքել»:
Լուսինե ԲՈՒԴԱՂՅԱՆ
