«Կանանց ներգրավվածությունը անհրաժեշտություն է քաղաքականության մեջ եւ որոշումների կայացման գործընթացում»,- հոկտեմբերի 5-ին «Հոդված 3» մամուլի ակումբում լրագրողների հետ զրույցում ասաց «Լուսավոր Հայաստան» կուսակցության խորհրդի անդամ Մանե Թանդիլյանը:
Նա նշեց, որ քաղաքական գործընթացներին մասնակցությունը դեռ սկիզբն է, սակայն առկա են մշակութային եւ կարծրատիպային խոչընդոտներ. «Կանանց՝ որպես որոշում կայացնողներ եւ ղեկավարներ, դեռ չեն տեսնում: Սակայն իրականում մարդիկ՝ տղամարդիկ, ինչու ոչ նաեւ կանայք չեն տեսնում վերջնական կին ղեկավարների, որոնք կկարողանան առաջնորդել քաղաքը եւ զարգացնել»:
Գառնիի համայնքապետի նախկին թեկնածու Արուսյակ Այվազյանը (լուսանկարում) կիսվեց իր փորձով: Նա նշեց, որ երբեւէ մտադրություն չի ունեցել առաջադրել իր թեկնածությունը, սակայն Ազատ գետի պայքարից հետո մտածել է, թե ինչպես կարելի է նման խնդիրների առաջ չկանգնել. «Փորձեմ ես էլ ներգրավել այդ հարցերի մեջ, որպես ղեկավար անձ, տեսնեմ, թե ինչպիսի մոտեցում կարող եմ ցուցաբերել: Դա էր պատճառը, բացի այդ բնակիչների մի մասն էլ խնդրում էր, պահանջում էին, որ առաջադրեմ իմ թեկնածությունը: Երբ ծրագիր կազմեցի, ներկայացրեցի, դա շատ կարճ ժամանակ էր՝ մեկ ամիս առաջ որոշեցի, որ պետք է առաջադրեմ թեկնածությունը, ուստի ես չէի կարող թիմ հավաքել:
Չնայած այդ թիմի իմաստը ես այդքան էլ չեմ կարող ճիշտ համարել՝ եթե համայնք է, գիտակցում, ճանաչում է մարդուն, ապա համայնքը թիմ է դառնում: Սակայն, զգացի, որ այդպես չէ ներկա պարագայում: Եվ մարդիկ, որոնք ծանոթանալով իմ ծրագրին, ողջունում էին եւ չէին կասկածում, բայց եկավ վերջին օրը, ես նկատեցի մարդիկ խուսափում էին, փորձում էին հայացքները փախցնել, չգիտեմ, թե ինչն էր պատճառը: Մինչ այդ շատ ջերմ էին, գուցե այդ կարծրատիպերը գործում են, գուցեեւ սեռային խտրականություն են դնում: Այդ օրը նկատեցի սառը խուսափողական տրամադրություններ, իհարկե՛, չպետք է ընտրվեի»:
Կարդացեք նաև
Ամի ՉԻՉԱԿՅԱՆ
