Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարանում տեղի ունեցավ լրագրող Սիրանույշ Պապյանի՝ ընդդեմ ոստիկանապետի գործով նախնական դատական նիստը:
Դատական նիստից հետո Սիրանույշ Պապյանի պաշտպան Դավիթ Ասատրյանը լրագրողների հետ զրույցում ասաց, որ դատական գործի վերաբերյալ գրառում է կատարվել Հայոց ցեղասպանության վերաբերյալ՝ Ցեղասպանության բովանդակությունը շահարկելով եւ համադրելով սույն գործի հետ, ինչը փաստաբանի կարծիքով, որեւէ առնչություն չունի. «Ներկայացվել է նաեւ պատասխանողի աշխատանքային լուսանկարը, եւ հնարավորություն է տրվել, որպեսզի այլ անձինք վիրավորական եւ ծաղրանքի մեկնաբանություններ գրեն իմ վստահորդի մասին, ինչն ի սկզբանե անթույլատրելի է: Կարծում եմ՝ պատասխանողի ներկայացուցիչը հնարավորություն ուներ վերացնել այդ գրառումը, այսինքն՝ նպատակը հասկանալի է, թե ինչի համար է իրականացնում: Փերինչեքի գործի համադրումը իրականացնելով՝ մենք գտնում ենք, որ դա նպատակ է ծառայում հասարակության ուշադրությունը շեղելու»:
Դավիթ Ասատրյանը նշեց նաեւ, որ կողմը մտավախություն ունի, որ հայցադիմումի պատասխանը ուշացմամբ է ներկայացվել դատական նիստ հետաձգելու համար. «Իսկ դատական նիստի հետաձգվելը նպատակ են հետապնդում, որ հասարակությունը տվյալ գործը մոռանա: Արդյունքում էլ կարող են արձագանքել, որ հասել են իրենց նպատակին»:
Դատական նիստը հետաձգվել է, հաջորդ նախնական դատական նիստը նշանակվել է նոյեմբերի 8-ին:
Կարդացեք նաև
Հիշեցնենք, որ Ծիծեռնակաբերդում, ՀՀ Ոստիկանապետ Վլադիմիր Գասպարյանը լրագրողի դիտարկմանն ի պատասխան`ոստիկանության բարեփոխումների մասին, նրանց անվանել է դեղնած, գունաթափված, իսկ վերջում Սիրանույշ Պապյանի դիտարկմանը արձագանքել է. «Ես քո մեջ, կներես, կին չեմ տեսնում»:
Ամի ՉԻՉԱԿՅԱՆ
Լուսանկարը՝ Սիրանույշ Պապյանի ֆեյսբուքյան էջից
