ՀՀ ԱԺ արտաքին հարաբերությունների մշտական հանձնաժողովը Արտակ Զաքարյանի նախագահությամբ հոկտեմբերի 5-ին գումարել է արտահերթ նիստ:
Պատգամավորները քննարկել են 2014 թվականի դեկտեմբերի 23-ին Մոսկվայում ստորագրված «Տեղեկատվական ոլորտում հանցավոր գործունեությանը հակազդման հարցերով Հավաքական անվտանգության մասին պայմանագրի կազմակերպության անդամ պետությունների փոխգործակցության մասին» արձանագրությունը, որը ներկայացրել է ՀՀ ոստիկանության պետի տեղակալ Վարդան Եղիազարյանը: Հիմնական զեկուցողը տեղեկացրել է, որ փաստաթղթով սահմանվում են տեղեկատվական ոլորտում հանցավոր գործունեությանը հակազդելու ուղղությամբ ՀԱՊԿ անդամ պետությունների փոխգործակցության կարգը, մասնավորապես համագործակցության ձեւերն ու ուղղությունները, անհրաժեշտ աջակցություն ցուցաբերելու մասին լիազորված իրավասու մարմնի դիմումի բովանդակությունը, նպատակներն ու դրանց կատարման ժամկետները: Արձանագրության շրջանակներում կողմերը տեղեկատվություն կփոխանակեն տեղեկատվական տեխնոլոգիաների ոլորտում նախապատրաստվող կամ կատարված հանցագործությունների ու դրանց կանխման, հայտնաբերման, խափանման, բացահայտման եւ քննության ձեւերի ու մեթոդների մասին, ինչպես նաեւ հանցագործություններին մասնակից ֆիզիկական եւ իրավաբանական անձանց մասին:
Արձանագրությունը հանձնաժողովի դրական եզրակացությամբ կներկայացվի խորհրդարանի վավերացմանը:
Կարդացեք նաև
ՀՀ ԱԺ հասարակայնության եւ տեղեկատվության միջոցների հետ կապերի վարչություն
