ԱԺ-ում քննարկվում է ԿԸՀ նախագահի պաշտոնում առաջադրված Տիգրան Մուկուչյանի թեկնածության հարցը:
ԱԺ փոխխոսնակ Հերմինե Նաղդալյանն իր ելույթում անդրադարձավ ԿԸՀ-ի հասցեին հնչած մեղադրանքներին: Նա ասաց, որ ԿԸՀ-ի լիազորությունները հստակ սահմանված են. «Նրանց գործունեությունը ընտրության արդյունքի վրա չունի եւ չի կարող ունենալ որեւէ ազդեցություն: ՏԻՄ ընտրությունների հետ կապված այստեղ լսեցինք բազմաթիվ ելույթներ, բազմաթիվ դեպքերի մասին, որոնց մասին պաշտոնական բողոքարկում չկա: Տասնյակ ահազանգեր, որոնք հետեւից ինքներդ գնացել եք, բայց ոչինչ չեք հայտնաբերել: Բարձրաձայնում եք եւ հասարակական կարծիք ստեղծում: Վատ պարողի նման մեղադրում եք ում ասես՝ բացի ձեզանից»:
Նա հայտարարեց, որ «Տիգրան Մուկուչյանը եւ ԿԸՀ-ն ձեր հաջողությունների, ինչպես նաեւ անհաջողությունների համար պատասխանատու չեն: Աշխատեք ընտրողի հետ, աշխատեք ստանալ նրա ձայնը: Սա է ճանապարհը»:
Երեկ Տիգրան Մուկուչյանը, պատասխանելով Թեւան Պողոսյանի հարցին, որ ի՞նչն է հրապուրել ԿԸՀ նախագահի աշխատանքում, որ էլի առաջադրվել եք՝ այդքան վիրավորանքներից, պիտակավորումներից հետո՝ ասաց, որ ինքը հրապուրված չէ:
Կարդացեք նաև
Հերմինե Նաղդալյանի խոսքերով՝ «Շատ վատ է, որ հրապուրված չեք, պարոն Մուկուչյան: Ես կարծում եմ, պիտի հրապուրված լինեիք եւ հրապուրանքը մի քիչ տարածեիք ԿԸՀ անդամների վրա: Չեմ կարծում, որ իր աշխատանքով հրապուրված լինելը մերժելի հատկանիշ է, դա գովելի է»:
Հռիփսիմե ՋԵԲԵՋՅԱՆ
