«Հայացք» մամուլի ակումբում այսօր «Սասնա ծռերին» օժանդակելու մեջ մեղադրվող, «Հիմնադիր խորհրդարանի» անդամ Կարո Եղնուկյանի փաստաբան Տիգրան Հայրապետյանը հայտնեց, որ վաղը դիմելու է Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարան` իր պաշտպանյալի խափանման միջոցը գրավով փոխարինելու միջնորդությամբ: Նիստը տեղի կունենա 17:10-ին: «Մեկ միլիոն դոլարի չափով անշարժ գույք ենք առաջարկում, բայց դատարանն ինքը կարող է որոշել գումարի չափը»,-տեղեկացրեց Տիգրան Հայրապետյանը:
Կալանավորված Կարո Եղնուկյանի եղբայրը` Գրիգոր Եղնուկյանը նշեց, որ Կարո Եղնուկյանի նախնական կալանքի փաստը դատապարտում են մի շարք քաղաքական գործիչներ, տեղական եւ միջազգային հեղինակավոր իրավապաշտպան-կազմակերպություններ, պատգամավորներ, շոու-բիզնեսի ներկայացուցիչներ:
Դատապարտող հայտարարությամբ հանդես է եկել նաեւ ՀՀ-ում ԱՄՆ դեսպանը: «Մեկ հեղինակավոր անձի երաշխավորումը բավարար է, որ խափանման միջոցը փոխվի, իսկ նրանք երեսունից ավելին են: Եթե խափանման միջոցը չփոխվի, պարոն Եղնուկյանը լրացուցիչ հայտարարություններ կանի վաղը: Եթե այս ամենն անտեսվի, եթե մեր դատարանները շարունակեն նրան կալանքի տակ պահել, կհաստատվի, որ նա քաղհալածյալ է»,-նկատեց Տիգրան Հայրապետյանը:
Կարդացեք նաև
Գրիգոր Եղնուկյանը նշեց, որ դիմել են նաեւ մի կին պատգամավորի, ով Եղնուկյաններին ճանաչում է 25 տարի: Սակայն նա հրաժարվել է Եղնուկյանի մասին բնութագիր ներկայացնել` պատճառաբանելով, թե իշխանական թեւի ներկայացուցիչ է. «Ասաց, որ քաղաքական գործիչ է, չի կարող միջամտել»:
Լուիզա ՍՈՒՔԻԱՍՅԱՆ
