Այսօր ԱԺ-ում քննարկվում է ԿԸՀ նախագահի պաշտոնում Տիգրան Մուկուչյանի վերընտրման հարցը:
ՕԵԿ խմբակցության ղեկավար Հեղինե Բիշարյանը բողոքեց, որ ընտրատեղամասերի մոտ ոստիկաններն իրենց գործառույթները չեն կատարում. «Ձեւի համար՝ որպես գույք, նստած են տեղամասերում: Հնարավո՞ր է մի մոտեցում որոշեք ու իրենց հասկացնեք, թե ինչ գործառույթ ունեն: Իրենց համար այնտեղ նստած «քյաբաբ-մաբաբ» են ուտում ու ով ինչ բաժանի, ընտրակաշառք, իրենց վեջը չի»:
Տիգրան Մուկուչյանը հերքեց, որ ոստիկանները քյաբաբ են ուտում. «Որեւէ տեղամասում որեւէ ահազանգ չկա, որ այդ մարդիկ այնտեղ նստած քյաբաբով հաց են ուտում: Վերջիններս ունեն իրենց հստակ գործառույթը՝ կարգուկանոն պահպանելու առումով»:
Նա վստահեցրեց, որ ոստիկանները շատ լավ են աշխատել եւ միջամտել՝ ըստ պահանջի: Չի կարող լինել դեպք, որ ընտրատեղամասում կաշառք բաժանեն եւ ոստիկանները չմիջամտեն:
Կարդացեք նաև
Հեղինե Բիշարյանն էլ վստահեցրեց, որ իր օրինակով կարող է ասել, թե որտեղ է հայտնվել ու ինչպես են փող բաժանելու դարակները փակել:
Հետո նա հարցրեց՝ ինչպես էլ հաշվում ենք, Բալասանյան դաշինքի ձայները չեն հասնում 40 տոկոսի. «Ի՞նչ եք անելու, ինչպե՞ս եք անելու, զոռով կարելի՞ է նրան բրդել ներս»:
Տիգրան Մուկուչյանը «տղայական» պատասխան տվեց. «Մենք որեւէ բան անելու չունենք եւ ինչպես անելու էլ չունենք: Կան հստակ թվեր, իրականացվում է հաշվարկն ու վերջ»:
Հռիփսիմե ՋԵԲԵՋՅԱՆ
