«Իմ տեղեկություններով` ուսումնասիրված բոլոր նյութերն ուղարկված են Մարդու իրավունքների եվրոպական դատարան: Պետք է սպասենք առաջին արձագանքին, այսինքն, որ ստացել են»,-«Փաստարկ» մամուլի ակումբում այսօր խոսելով ապրիլյան ռազմական գործողությունների ընթացքում Ադրբեջանի զինվորների կողմից ԼՂՀ ՊԲ զինծառայողների հանդեպ վայրագությունների եւ խոշտանգումների դեպքերի մասին, ասաց ՀՀ առաջին օմբուդսմեն Լարիսա Ալավերդյանը:
Նա նշեց, որ ՄԻԵԴ-ի երկրորդ արձագանքը պետք է լինի այն մասին, որ նյութերն ընդունվել են, իսկ երրորդը` մասնավորապես Ադրբեջանին համապատասխան հարցումներ ուղարկելը: «Այսօրվա դրությամբ ավարտված է առաջին փուլը` գործերի կազմումը եւ ուղարկումը»,-ասաց Լարիսա Ալավերդյանը` հավելելով, որ կախված դեպքերից` փուլերի միջեւ ժամանակահատվածը տարբեր է,-«Մինչեւ այսօր Ադրբեջանում ոչ մի քրեական գործ չի հարուցվել, երկու զինծառայողի գլուխ չի վերադարձվել: Այսինքն, ժամկետներ ասելը ճիշտ չի լինի»:
Բանախոսը նաեւ նշեց, որ ՄԻԵԴ-ի վճիռը շատ երկրներ շրջանցում են, սակայն այն հետագայում կարող է հիմք ծառայել միջազգային այլ կառույցների համար` Եվրոպայի խորհուրդ, ԵԱՀԿ, ԵՄ, ՄԱԿ:
Լուիզա ՍՈՒՔԻԱՍՅԱՆ
