«Հասարակության մեջ կա Մուկուչյանի հանձնաժողով հասկացությունը: Ձեր հանձնաժողովն ունի խիստ բացասական ռեյտինգ՝ հեղինակություն»,-այսօր ԱԺ-ում ԿԸՀ նախագահի պաշտոնում առաջադրված թեկնածու Տիգրան Մուկուչյանին ասաց ՀԱԿ խմբակցության քարտուղար Արամ Մանուկյանը:
ԱԺ-ում քննարկվում է Կենտրոնական ընտրական հանձնաժողովի նախագահի եւ անդամների ընտրության հարցը:
Արամ Մանուկյանի խոսքերով՝ ԿԸՀ-ն ընտրական գործընթացում խաղացող չի. «Դուք ընդամենը կից կառույց եք, որն արձանագրում է այն, ինչ պետք է արձանագրվեր: Գոնե մեկը ձեր նախաձեռնությամբ կարող էր աղմուկ հաներ,որ քաղաքացին տեսներ՝ Մուկուչյանը հետեւողական է այս խախտման համար: Դուք այս դաշտում չկաք: Վերջին ընտրությունները՝ ձեզ փաստ. Բոլոր խախտումները կատարվում են մինչեւ հանձնաժողով: Իդեալական մշակած տարբերակ է աշխատում՝ կաշառքի, մարդկանց վրա ազդելու,անձնագրեր հավաքելու, հազար ու մի մեթոդ կա: Դուք չկաք, ո՞նց եք անելու՝ այս խնդիրը լուծելու համար: Սա ժողովրդավարության ողնաշարն է, դուք պաշտպանն եք, դատավորն եք դրա, բայց ազդեցություն չունեք: Որտե՞ղ է ձեր նախաձեռնողականությունը»:
Տիգրան Մուկուչյանը պատասխանեց, որ ԿԸՀ-ն պետական մարմին է, եւ օրենսդրությամբ սահմանված գործառույթներից դուրս չի կարող գործել. «Վերջիններիս գործառույթը ոչ թե քաղաքական գնահատական տալն է, այլ իրավական կարգավորումը գործընթացի»:
Կարդացեք նաև
Արամ Մանուկյանը կոնկրետ օրինակ նշեց. «Վանաձորի ընտրություններից առաջ ՀՀԿ-ի թեկնածուն, որը նոտարն էր եւ իր անունով հիմնադրամ է բացել, հեռուստատեսությամբ գովազդում է, ասում է՝ բոլոր նրանք, ովքեր ակնոցի կարիք ունեն, եկեք ակնոցները ստացեք: Հազարավոր մարդիկ բարեգործական հիմնադրամի միջոցով ակնոցներ ստացան: Չէ՞ որ դուք տեսնում եք, որ սա ակնհայտ օրենքի խախտում է, չե՞ք կարող նախաձեռնել եւ արդարության տանել: Գոնե ցանկություն ունե՞ք, որ դառնաք խաղացող, կեղծիքների դեմն առնեք»:
Տիգրան Մուկուչյանը պատասխանեց, որ Վանաձորի եւ Գյումրիի ընտրություններին բազմաթիվ կուսակցությունների լիազոր անդամներ բազմաթիվ հարցերով դիմել են հանձնաժողովին եւ չի եղել դեպք, որ միջոցներ չձեռնարկվեն:
Հռիփսիմե ՋԵԲԵՋՅԱՆ
